آگئے اے حرم تیری آغوش میں عرشِ اعظم کے مسند نشیں آگئے

آگئے اے حرم تیری آغوش میں عرشِ اعظم کے مسند نشیں آگئے

اپنی امت کا پیغامِ بخشش لیے آج آقائے روح الامیں آگئے

زلف بکھری تو لہرائی کالی گھٹا رخ کو دیکھا تو سورج تڑپنے لگا

جس کی ہر اک ادا پر دو عالم فدا وہ حسینوں سے بڑھ کر حسیں آگئے

پُشتِ اقدس پہ مُہرِ نبوت لیے ساتھ ساتھ آفتابِ ہدایت لیے

اک جداگانہ شانِ حکومت لیے آگئے شاہِ دنیا ودیں آگئے

سبزۂ برگ وگل میں ہے پیدا نمو حسن پر آگیا عالمِ رنگ وبو

بھر لیں بھرلیں سبھی دامنِ آروزو باغِ عالم کے ناز آفریں آگئے

چارہ سازِ مریضانِ کلفت زدہ ،درد مندان ومضطر کی آہِ رسا

فخرِ انسانیت نازشِ انبیا ،زینتِ محفلِ مرسلیں آگئے

بابِ چشمِ تجسس اگر باز ہے جس قدر دیکھئے راز ہی راز ہے

اپنی صنعت پہ صانع کو خود ناز ہے ناز پروہ دہ ناز آفریں آگئے

نیّرِ بُرجِ آدم سمجھئے جنہیں ایک نورِ مجسم سمجھئے جنہیں

اعتمادِ دو عالم سمجھئے جنہیں آج واصفؔ وہ حسنِ یقیں آگئے