یہی ہے عرض یہی التجا غریب_نواز

یہی ہے عرض یہی التجا غریب نواز

کہ پھر ہو آج در فیض وا غریب نواز

میں جان لوں کہ مجھے مل گیا مرا مقصود

اگر یہ جان ہو تم پر فدا غریب نواز

خطر ہو کس طرح طوفاں کا اس سفینے کو

کہ جس کے آپ ہی ہیں نا خدا غریب نواز

خدا کے واسطے اس وقت لاج رکھ لیجے

اب اٹھ چکا ہے یہ دست دعا غریب نواز

ہے اس طلب میں دل آرزو طلب اپنا

مری جبیں ہو ترا نقش پا غریب نواز

خدا کے واسطے منظورؔ پر کرم کیجے

ہے یہ بھی آپ کے در کا گدا غریب نواز