شبیہ_شفیع_الورا غوث_اعظم

شبیہ شفیع الورا غوث اعظم

سراپائے نور خدا غوث اعظم

ہیں رہبر مرے رہنما غوث اعظم

ہیں ہادی مرے پیشوا غوث اعظم

ہو تم ابن مشکل کشا غوث اعظم

مری مشکلیں حل ہوں یا غوث اعظم

نہ کیوں ورد ہر دم ہو یا غوث اعظم

مرے درد دل کی دوا غوث اعظم

جو سلطان کل انبیا مصطفیٰ ہیں

تو سلطان کل اولیا غوث اعظم

یہ دل تم پہ صدقہ جگر تم پہ قرباں

مری جان تم پہ فدا غوث اعظم

نہ کیوں بادشاہوں پہ ہو فخر حاصل

ہوں در کا تمہارے گدا غوث اعظم

فدا میں کروں تم پہ سو بار جاں کو

نظر آؤ اک بار یا غوث اعظم

امیری کی پروا نہ شاہی سے مطلب

میں ہوں تیرے در کا گدا غوث اعظم

نہیں ہے عجم ہی پہ موقوف شاہا

ہے چرچا ترا جا بجا غوث اعظم

قیامت میں حاذق کو پروا ہی کیا ہے

وہ طفلی سے ہے آپ کا غوث اعظم