رخِ روشن کی جھلک مہر درخشاں میں نہیں

رخِ روشن کی جھلک مہر درخشاں میں نہیں

چشمِ میگوں کا نشہ نرگس حیراں میں نہیں

تیری صورت کا تماشہ مہ کنعاں میں نہیں

تیری باتوں کا مزہ مرغِ خوش الحاں میں نہیں

جس نے دیکھا وہ پھنسا چھوٹنا دشوار ہوا

زلفِ جاناں کی لپٹ سنبل پیچاں میں نہیں

قیس و لیلا کی کہانی کا جدا ہے دفتر

بوستاں میں نہیں واعظ وہ گلستاں میں نہیں

باغ جنت میں بھلا لے کے کروں کیا واعظ

کوئے جاناں کی ہوا کوئے گلستاں میں نہیں

فضل و رحمت سے جو چھوٹا تو میں چھوٹا حاذقؔ

کون سا جرم مرے دفترِ عصیاں میں نہیں