سرگرم تیری حمد و ثنا میں ہزار ہے

سرگرم تیری حمد و ثنا میں ہزار ہے

تو حسن ہے چمن کا کلی کی بہار ہے

بے آسروں کو رہتا ہے تیرا ہی آسرا

تو چین ہے سکون ہے صبر و قرار ہے

محتاج تیرے در کے ہیں شاہ و گدا تمام

ہر ایک تیرے لطف کا امیدوار ہے

حاضر گناہ گار ہے تیرے حضور میں

اب بخش یا نہ بخش تجھے اختیار ہے

رنگیں ہر ایک پھول ہے تیرے جمال سے

ہر ذرہ تیرے حسن کا آئینہ دار ہے

پہنچا دے اس گدا کو نبی کے دیار میں

تجھ سے یہ التجا مری اے کردگار ہے

یوسفؔ گناہ گار سیہ کار ہی سہی

لیکن ترے کرم کا وہ امیدوار ہے