نہایت حال ہے ابتر معین الدین اجمیری

نہایت حال ہے ابتر معین الدین اجمیری

نظر رحمت کی ہو مجھ پر معین الدین اجمیری

گدا کو سلطنت اللہ سے سو بار دلوائے

تمہیں تو ہو گدا پرور معین الدین اجمیری

بتا دو راستہ سیدھا کہ میں ہوں راہ گم کردہ

تمہیں ہو ہادی و رہبر معین الدین اجمیری

دکھا دو اب رخ انور مجھے للہ اے سرور

تڑپتا ہے دل مضطر معین الدین اجمیری

گدا اور بادشاہ گردن جھکاتے ہیں یہاں آ کر

کہاں جاؤں میں اب اٹھ کر معین الدین اجمیری

کہاں احوال دل جا کر سناؤں اے مرے سرور

کوئی مونس نہ ہے یاور معین الدین اجمیری

ستم فرقت کے سہتا ہوں کسی سے کچھ نہ کہتا ہوں

گذرتی ہے جو کچھ دل پر معین الدین اجمیری

ابھی دونوں جہاں سے صاف بیڑا پار لگ جائے

مدد کر دو مری آ کر معین الدین اجمیری

ہماری تشنگی دید کو للہ بجھوا دو

کہ تم ہو مالک کوثر معین الدین اجمیری

لگا دو ناؤ یہ میری کنارے بحر عالم کے

بھنور میں کھاتی ہے چکر معین الدین اجمیری

مدد کو وقت مشکل آپ کا الطاف آتا ہے

پکاریں جب تمہیں رو کر معین الدین اجمیری

ٹھکانا ہی نہیں تھا ضبطؔ کا محشر کے لوگوں میں

نہ رکھتے ہاتھ جو سر پر معین الدین اجمیری