در محمد کے جو روضے کا اگر دیکھ لیا

در محمد کے جو روضے کا اگر دیکھ لیا

بخدا اس نے خدا پاک کا گھر دیکھ لیا

ہو گیا رحمت غفار سے وہ مالا مال

لطف سے تم نے جسے ایک نظر دیکھ لیا

لوگ جاتے ہیں مدینہ میں رہا جاتا ہوں

آہ میں کچھ نہیں افسوس اثر دیکھ لیا

روز کرتے رہے جبریل ہزاروں پھیرے

جب سے اللہ کے محبوب کا گھر دیکھ لیا

خواب میں ہی نظر آتا رخ حضرت لیکن

تو نہیں کام کی ہے آہ جگر دیکھ لیا

اہل محشر کے دلوں کو وہ ہوئی تقویت

احمد پاک کا جب دست نگر دیکھ لیا

لب چپک جاتے ہیں کہتا ہوں محمد جس دم

آپ کے نام میں ہے قند مگر دیکھ لیا

دور خدمت کے رہوں ہجر کے دیکھوں صدمے

یہ مگر آپ کو ہے مد نظر دیکھ لیا

خواب تک میں بھی زیارت نہ ہوئی حضرت کی

تری گردش کو بھی اے شام و سحر دیکھ لیا

آپ فرمائیں تو افلاک زمین پر آئیں

آپ کے حکم میں ہیں شمس و قمر دیکھ لیا

منہ چھپائیں گے ابھی ماہ و مہر غیرت سے

جلوۂ نور محمد جو اگر دیکھ لیا

بخش دے امت عاصی کو جب ہی خالق نے

آپ کو غار میں جب دیدۂ تر دیکھ لیا

کوئی دنیا میں ہمیشہ نہ رہا ہے نہ رہے

عاقبت سب کو ہے اے ضبطؔ سفر دیکھ لیا