جو دیکھا خواب میں جلوہ معین الدین چشتی کا

جو دیکھا خواب میں جلوہ معین الدین چشتی کا

تو دل سے ہو گیا بندہ معین الدین چشتی کا

جہاں میں آ کر اس شخص نے کچھ بھی نہیں دیکھا

نہیں دیکھا اگر روضہ معین الدین چشتی کا

دعائیں ہیں یہی ہر دم کہ اب اجمیر پہنچا کر

دکھا دے یا خدا جلوہ معین الدین چشتی کا

جسے ہو سیر کرنا خلد کا منظور دنیا میں

وہ آ کر دیکھ لے روضہ معین الدین چشتی کا

فرشتوں چین سے سونے دو اس کو کنج مدفن میں

ہے جاگا عمر بھر شیدا معین الدین چشتی کا

مریدوں میں ضعیف و ناتواں گر جائیں گے کس طرح

سہارا ہے انہیں کیسا معین الدین چشتی کا

مطالب دل کے جو پاوے وہ ہر دو دیغ پکوائے

تبرک ہے بہت اچھا معین الدین چشتی کا

فدا ہونے سے خالق پر ہوا یہ مرتبہ حاصل

سبھی کو نام ہے پیارا معین الدین چشتی کا

ملائک حور و غلماں دیکھ کر درگاہ کہتے ہیں

ہے روضہ خلد سے اچھا معین الدین چشتی کا

میرا دل جانتا ہے اور خدا دانا و بینا ہے

طبیعت کو جو ہے سودا معین الدین چشتی کا

نہ اس کو فکر دنیا ہے نہ ہے کچھ خوف محشر کا

جو دل سے ہو گیا شیدا معین الدین چشتی کا

طلب حور بہشتی کی نہ خواہش قصر جنت کی

یہاں تو دل کو ہے تقوا معین الدین چشتی کا

نہیں یہ ضبطؔ کی ہمت جو لکھے آپ کی مدحت

لکھے جو لطف ہو تھوڑا معین الدین چشتی کا