تو عطا میرے لئے غیب سے ساماں کردے

تو عطا میرے لئے غیب سے ساماں کردے

میرے معبود مری زندگی آساں کردے

شاخ در شاخ وفا کے گل صد رنگ کھلا

میرے اس دشت تمنا کو گلستاں کردے

ظلمت یاس میں دم گھٹنے لگا ہے میرا

مہر امید کے جلووں کو نمایاں کردے

اس سے پہلے کہ ہو احساس تہی دامانی

گل مقصود سے لبریز یہ داماں کردے

کر مصیبت میں مرے دل کو عطا صبر جمیل

مجھ کو رسوا نہ کہیں دیدۂ گریاں کردے

یہ تری شان ہے یہ ہے تری عظمت مولا

تو نہیں کو بھی اگر چاہ لے تو ہاں کردے

بے یقینی کے مرض سے مجھے مل جائے نجات

تو مرے واسطے تجویز وہ درماں کردے

راہ منزل میں بہ ہرگام پریشاں ہے ظفرؔ

اب عطا اس کو بھی تسکین دل و جاں کردے