دو_جہاں میں ہے ضیائے_شمع_دین_مصطفیٰ

دو جہاں میں ہے ضیائے شمع دین مصطفیٰ

ہیں زمین و آسماں زیر نگین مصطفیٰ

ہے رخ شمس و قمر پرتو گزین مصطفیٰ

اللہ اللہ جلوۂ نور جبین مصطفیٰ

پستیوں میں بھی نمایاں رفعتوں کی شان ہے

وقت سجدۂ عرش تھا زیر جبین مصطفیٰ

ظلم کے بدلے میں ملتی ہے ہدایت کی دعا

درس ہے اخلاق کا تعلیم دین مصطفیٰ

قلب مومن جو خدا کا گھر خدا کا عرش ہے

غور سے دیکھا تو نکلا سرزمین مصطفیٰ

وہ لباس بندگی میں قدرت حق کی دلیل

دست حق پنہاں ہے زیر آستین مصطفیٰ

ثم وجہ اللہ کی تفسیر آساں ہو گئی

صورت حق معنی روئے مبین مصطفیٰ

ہر نبی کا اک جدا طاسین ہے لیکن ذہینؔ

خاص طاسین محمد ہے ذہین مصطفیٰ