ہے فیض آپ کا فیض_اتم غریب_نواز

ہے فیض آپ کا فیض اتم غریب نواز

کرم ہے آپ کا رب کرم غریب نواز

سر نیاز جھکائیں سب اہل دیر و حرم

ملے جو آپ کا نقش قدم غریب نواز

تمہیں نے بندہ نوازی سکھائی عالم کو

تمہیں ہو مخزن لطف و کرم غریب نواز

خدا سے ملتی ہوئی ہے جہان بخشش میں

تمہاری شان خدا کی قسم غریب نواز

بہت ہی تشنہ ہے دل آپ کی عنایت کا

پلائیے مجھے جام کرم غریب نواز

بجز تمہارے کہیں کس سے حال دل اپنا

ہمارے تم ہو تمہارے ہیں ہم غریب نواز

تمام اہل جہاں بھر لیں جھولیاں اپنی

بڑھائیں آپ کو جو دست کرم غریب نواز

پیا ہے آپ کی الفت کا جس نے ساغر مے

نظر میں لائے وہ کیا جام جم غریب نواز

ستا رہا ہے غم روزگار مدت سے

مٹائیے دل شاربؔ سے غم غریب نواز