بھر کے پچکاریوں میں رنگیں رنگ

بھر کے پچکاریوں میں رنگیں رنگ

نازنیں کو کھلائے ہولی سنگ

چلتی ہے دو طرف سے پچکاری

منہ برستا ہے رنگ کا بھاری

بادل آئے ہیں گھری گلال کے لال

کچھ کسی کا نہیں کسی کو خیال

ہاتھ میں جس کے واں ہزارا ہے

ایک عالم کو اس نے مارا ہے

ہیں جو مصروف سب صغیر و کبیر

اڑ رہا ہے گلال اور عبیر

بن گئے ہیں ہوا میں وہ بادل

اور زمیں میں پڑے ہیں تھل کے تھل

سر کے بالوں کا ہے کسی کو غم

کوئی ملتی ہیں آنکھ ہی ہر قدم

ہیں کھڑی کوئی بھر کے پچکاری

اور کسی نے کسی کو جا ماری

کوئی جاتی ہے اس طرف سے ادھر

کوئی آتی ہے اس طرف سے ادھر

بھر کو پچکاری وہ جو ہے چالاک

مارتی ہے کسی کو دور سے تاک

کسی نے بھر کے رنگ کا تسلہ

ہاتھ سے ہے کسی کا منہ مسلا

اور مٹھی میں اپنی بھر کے گلال

ڈال کر رنگ منہ کیا ہے لال

جس کے بالوں میں پڑ گیا ہے عبیر

بڑبڑاتی ہے یہ وہ ہو دلگیر

ایسی ہولی کا کھوجڑا جاوے

کوئی نوج ایسے کھیل میں آوے

جس کی آنکھوں میں پڑ گیا ہے گلال

وہ یہ کہتی ہے ٹھنک کے ہیں فی الحال

چل گئی مجھ پہ آہ فوج کی فوج

گھر سے میں اپنے آج آئی نوج

جس نے ڈالا ہے حوض میں جس کو

وہ یہ کہتی ہیں کوس کر اس کو

یہ ہنسی تیری بھاڑ میں جائے

تجھ کو ہولی نہ دوسری آئے