تفسیر قول حکیم: بہ ہرچہ از راه و امانی چہ کفر آں حرف و چہ ایماں بہرچہ از دوست دور افتی چہ زشت آں نقش و چہ زیبا و در معنی قولہ علیہ السلام إن سعدا لغیو ر و أنا أغیر من سعد و الله أغیر منی و من غیرته حرم الفواحش ما ظهر منها و ما بطن

حکیم سنائی کے قول کی تفسیر خدا اُنکی روح کو راحت دے جس چیز کی وجہ سے تو راستہ سے بھٹک جائے وہ کلمۂ کفر ہوا تو کیا اور ایمان ہوا تو کیا جس سے تم دوست سے دور ہو جاؤ وہ نقش بُرا ہو تو کیا اچھا ہو تو کیا اور آنحضور صلیّ اللہ علیہ وسلم کے اِس فرمان کے معنیٰ کہ سعدؓ بیشک غیر تمند ہے اور میں اُس سے بھی زیادہ غیرتمند ہوں اور اللہ مجھ سے بھی زیادہ غیرتمند ہے اور اللہ نے اپنی غیرت کی وجہ سے تمام کھلی اور ڈھکی بدکاریوں کو حرام قرار دیا ہے

تمام دنیا اِس لئے غیرت مند بنی کہ اللہ تعالیٰ

غیرت میں اِس دنیا پر سبقت لے گیا ہے

وہ ان کی طرح ہے اور دنیا جسم کی طرح

جسم، جان سے نیکی اور بدی قبول کرتا ہے

جس کی نماز کی محراب ذات ہو

اُس کا ایمان کی طرف جانا تو عیب سمجھ

جو بادشاہ کا مہتمم توشہ خانہ ہو

اُس کا بادشاہ کے لئے تجارت کرنا ٹوٹے کی بات ہے

جو بادشاہ کا ہمنشیں ہو

اُس کا دروازہ پر بیٹھنا قابل افسوس اور نقصان بات ہے

جب اسکو بادشاہ کی دست بوسی حاصل ہو گئی

اگر پابوسی اختیار کرے تو گناہ ہوگا

اگر چہ پیروں پر سررکھ دینا خدمت ہے

(لیکن) اُس خدمت کے مقابلہ میں غلطی اور لغزش ہے

بادشاہ کو اُس پر غیرت آئے گی جو

خوشبو اِختیار کرے جبکہ چہرہ دیکھ لیا ہے

اللہ کی غیرت، گیہوں جیسی ہے

انسانوں کی غیرت بھوسے کی طرح ہے

غیرتوں کی جڑ خدا سے سمجھو

بلا شبہ مخلوق کی غیرت خدا کی غیرت کی شاخ ہے

اِس کی شرح چھوڑتا ہوں، شکوہ شروع کرتا ہوں

اُس دس دل والے محبوب کی جفا کا

اسلئے روتا ہوں کہ اُسکو رونا اچھا لگتا ہے

دونوں جہاں کی جانب سے اُسکو رونا پسند آتا ہے

اُسکے ناز و انداز کی وجہ سے کڑوے آنسو کیوں نہ بہاؤں

اُس ے عاشقوں کے حلقے میں کیوں نہ داخل ہوں؟

اُس کے دن کے بغیر میں رات کی طرح کیوں نہ ہو جاؤں

اُس کے، دن کو روشن کرنیوالے چہرہ کی وصال کے بغیر

اُسکی جانب سے ناگوار، میری جان کو گوارا ہے

دل دُکھانے والے یار پر میری جان قربان ہے

میں اپنے رنج اور اپنے درد کا عاشق ہوں

اپنے بے مثال شاہ کی خوشنودی کے لئے

میں غم کی خاک کا آنکھوں کے لئے سُرمہ بناتا ہوں

تاکہ آنکھوں کے دونوں سمندر موتیوں سے بھر جائیں

لوگ جو آنسو اس کے لئئے بہاتے ہیں

موتی ہیں، لوگ اُنکو آنسو سمجھتے ہیں

میں جانِ جاناں کی شکایت کرتا ہوں

میں شاکی نہیں ہوں، بیان کر رہا ہوں

دل کہتا ہے میں اُس سے رنجیدہ ہوں

کمزور نفاق سے، میں ہنستا ہوں

اے وہ ذات کی تو سچّوں کا فخر ہے! سیدھا چل

اے وہ کہ تو صدر ہے اور میں تیرے در کی دہلیز ہوں

حقیقتاً آستاں اور صدر کہاں ہے؟

جہاں ہمارا یار ہے وہاں’’ماو من‘‘ کہاں ہے؟

اے وہ کہ تیرے ذات’’ما و من‘ ‘سے آزاد ہے

اے! مرد اور عورت میں لطیفۂ روح

مرد و زن جب ایک ہو جائیں وہ ایک تو ہی ہے

جب سب مٹ جائیں اب تو وہی ہے

اِس’’من و ما‘‘ کو تونے اِس لئے بنایا ہے

تاکہ تو خدمت کی بازی کھیلے

جب’’من و تو‘‘ سب ایک جان ہو جائینگے

انجام کار جاناں میں فنا ہو جائینگے

یہ سب کچھ ہے، اور آجا اے حاکم

اے وہ (ذات) جو بیان اور کلام سے پاک ہے

جسمانی آنکھ تجھے نہیں دیکھ سکتی ہے

تجھے خیال میں لا سکتا ہے غم اور ہنسنا؟

وہ دل جو غم اور ہنسی سے وابستہ ہے

تو بتا وہ دیدار کے قابل ہے؟

جو غم اور ہنسی سے سے مقیّد ہو

وہ اِن دونوں عارضی چیزوں سے زندہ رہتا ہے

عشق کا سبز باغ جو دائمی ہے

اُس میں غم اور خوشی کے علاوہ بہت سے میوے ہیں

عاشقی اِن دونوں حالتوں سے بلند و بالا ہے

(وہ) بے بہار اور بے خزاں سبز اور تر ہے

اے (محبوب) خوبرو اپنے مکھڑے کی زکوٰۃ عطا کر

پارہ پارہ جان کی شرح پھر کر دے

چغلخور ناز کے انداز سے

اُس نے میرے دل پر تازہ داغ لگا دیا ہے

میں نے اُس کے لئے حلال کر دیا اگر وہ میرا خون بہائے

میں حلال حلال کہتا رہا وہ گریز کرتا رہا

خاکساروں کے نالہ سے تو کیوں گریزاں ہے؟

غمگینوں کے دل پر کیوں غم پاشی کرتا ہے؟

اے محبوب! ہر صبح جو مشرق سے نمودار ہوئی

اُس نے مشرق کے سورج کی طرح تجھے تاباں پایا

اپنے عاشق سے تو کیوں بہانے کرتا ہے

اے وہ (محبوب) جس کے ہونٹوں کی شکر کی کوئی قیمت نہیں ہے

اے (محبوب) پُرانی دنیا کی تو تازہ جان ہے

بے جان اور بے دل جسم کی فریاد سُن لے

(اے دل) خدا کے لئے پھول کی تشریح چھوڑ

اُس بلبل کی تفصیل بتا جو پھول سے جدا ہوگئی ہے

غم اور خوشی سے ہمارا جوش (وابستہ) نہیں ہے

ہمارا ہوش خیال اور وہم سے (وابستہ) نہیں ہے

ایک دوسری ہی حالت ہے جو کمیاب ہے

تو مُنکر نہ بن اللہ بہت قدرت والا ہے

تو انسان کی حالت پر قیاس نہ کر

ظلم و احسان میں ٹکاؤ نہ کر

ظلم اور احسان، رنج اور خوشی سب نو پیدا ہیں

نو پیدا چیزیں فنا ہو جاتی ہیں اور اللہ انکا وارث ہے

اے صبح کے پشت وپناہ! صبح ہو گئی

میری مخدوم حسام الدّین سے معذرت کر

عقلِ کل اور جان سے معذرت چاہنے والا تو ہی ہے

جان کی جان اور مونگے کی چمک تو ہی ہے

ہماری صبح کا نور تیرے نور سے چمک اُٹھا

صبح کی شراب نوشی کے وقت تیری منور شراب کے ذریعہ

اللہ کی عطا جب مجھے ایسا بنائے رکھتی ہے

شراب کیا ہوتی ہے جو مجھے مست کرے؟

شراب، جوش میں ہمارے جوش کی بھکاری ہے

آسمان، گردش میں ہمارے ہوش پر قربان ہے

شراب ہم سے مست ہوئی ہے، نہ کہ ہم اُس سے

جسم ہماری وجہ سے پیدا ہوا ہے نہ کہ ہم اُسکی وجہ سے

ہم شہد کی مکّھی کی طرح ہیں اور جسم مُوم کی طرح

اُس نے جسم کی مُوم کی طرح خانہ خانہ بنا رکھا ہے