تفسیر ما شاء الله کان‌‌

جو اللہ نے چاہا ہوا جو نہ چاہا ہوا کی تفسیر

یہ سب کچھ ہم نے کہا لیکن ارادہ میں

خدا کی عنایتوں کے بغیر ہم ہیچ در ہیچ ہیں

اللہ اور اللہ کے مخصوص بندوں کی عنایتوں کے بغیر

اگر فرشتہ (بھی) ہے تو اُسکا نامہ اَعمال سیاہ ہے

اے خدا! اے قدرت والے کیفیت اور کمیّت سے

اِس قدر بلند محل تجھ سے بنا ہے

اسقدر رہنمائی تو نے بخشی ہے

جس سے تو نے بہت سے عیب ڈھک دئے ہیں

پہلے سے تونے جو عِلم کا قطرہ بخشا ہے

اُس کو اپنے دریاؤں سے مِلا دے

میری جان میں عِلم کا ایک قطرہ ہے

اُسکو خواہش اور جسم کی مِٹّی سے بچا دے

اس سے پہلے کہ یہ مِٹیاں اُسکو دھنسا لیں

اِس سے پہلے کہ یہ ہوائیں اُسکو سُکھائیں

اگرچہ تو اِس پر قادر ہے کہ جب وہ اُسکو سُکھائیں

کہ اُس کو تو اُن سے واپس لے لے

وہ قطرہ جو ہوا میں اُڑ گیا یا بہہ گیا

تیری قدرت کے خزانے سے کب بھاگ سکتا ہے؟

اگر وہ عدم یا سو عدموں میں بھی آجائے

جب تو اُسے بُلائے وہ سَر کے بل آئے

لاکھوں متضاد چیزیں متضاد چیزوں کو فنا کرتی ہیں

پھر تیرا فضل اُن کو باہر نکال لاتا ہے

ہر وقت عدموں سے وجود کی طرف

اے خدا! قافلہ در قافلہ(رواں) ہے

خصوصاً ہر رات تمام فکریں اور عقلیں

نیند کے سمندر میں غرق ہو کر معدوم ہو جاتی ہیں

پھر صبح کو خدا پرستوں کی طرح

مچھلیوں کی طرح سمندر سے سر ابھارتی ہیں

خزاں (کے موسم) میں لاکھوں شاخیں اور پتے

شکست کھا کر موت کے دریا میں چلے جاتے ہیں

کوّے نے نوحہ گر کی طرح سیاہ لباس پہنا ہے

باغ میں سبزہ پر نوحہ کرتا ہے

پھر ربّ العالمین کی جانب سے حکم آتا ہے

عدم کیلئے، کہ جو کچھ تو نے کھایا ہے واپس دے

اے کالی موت! جو تونے کھایا ہے، واپس دے

پودے اور گلاب اور پتّے اور گھاس

اے بھائی! تھوڑی دیر ہوش سنبھال

جتھ میں (بھی) ہر وقت خزاں اور بہار ہے

دل کے باغ کو سبز اور ترو تازہ دیکھ

غُنچہ اور گُلاب اور سرو اور چنبیلی ہے

پتّوں کی کثرت سے شاخیں ڈھکی ہوئی ہیں

پھولوں کی کثرت سے جنگل اور محل ڈھکے ہوئے ہیں

یہ باتیں جو عقل کل کی جانب سے ہیں

سرو اور سُنبل کے چمن کی خوشبو ہیں

جس جگہ پھول نہ تھا تونے پھول کی خوشبو سونگھی

تونے شراب کا نشہ اُس جگہ دیکھا ہے جہاں شراب نہ تھی؟

خوشبو تیری راہنما اور رہبر ہے

تجھے جنّت اور کوثر تک لیجائے گی

خوشبو نور پیدا کرنیوالی، آنکھ کی دوا ہے

خوشبو سے (حضرتِ) یعقوب کی آنکھیں کھل گئیں

بد بو آنکھ کو تاریک کرتی ہے

یوسف (علیہ السلام) کی خوشبو آنکھ کی مدد کرتی ہے

تو جب یوسف نہیں ہے یعقوب بنجا

اُس کی طرح رونے اور مصیبت میں رہ

حکیم غزنوی سے یہ نصیحت سُن لے

تاکہ پرانے جسم میں نیا پن پائے

ناز کرنیکے لئے گلاب جیسا چہرہ چاہئے

جب تو نہیں رکھتا ہے بد مزاجی کے قریب نہ جا

عیب ہے، اندھی آنکھ اور کھُلی ہوئی

بری بات ہے بدصورت چہرہ اور ناز

یوسف کے سامنے ناز اور نخرے نہ کر

سوائے عاجزی اور یعقوبی آہ کے (کچھ) نہ کر

طوطی کے مرنے کا مطلب عاجزی تھا

عاجزی اور احتیاج میں اپنے آپ کو مردہ بنالے

تاکہ (خصرت) عیسیٰؑ کا دم تجھے زندہ کردے

اپنی طرح تُجھے نیک اور مُبارک بنادے

پتّھر (موسم) بہار میں کب سرسبز ہوتا ہے

مٹی بن جا تاکہ رنگ برنگ کے پھول اُگیں

تو سالوں دلخراش پتھر رہا ہے

آزمائش کے طور پر تھوڑی دیر کیلئے خاک بن جا