منازعت امرا در ولی عہدی

سرداروں کا ایک دوسرے سے جھگڑا کرنا

بولا ، اب اس مرد کا میں قائم مقام ہوں

(اور) زمانہ میں حضرت عیسیٰ کا نائب میں ہوں

اب ، یہ دفتر میری دلیل ہے

کہ یہ قائم مقامی اس کے بعد میری ملکیت ہے

دوسرا سردار اپنی جگہ سے آیا

(اور) قائم مقامی میں اس کا بھی یہی دعویٰ تھا

اس نے بھی بغل میں سے دفتر دکھایا

یہاں تک کہ دونوں کو غصہ اور ضد آگئی

دوسرے سرداروں نے بھی صف بستہ ہو کر

تیز تلواریں سونت لیں

ہر ایک کے ہاتھ میں تلوار اور دفتر تھا

(اور) یہ سب مست ہاتھیوں کی طرح باہم گتھ گئے

لاکھوں عیسائی مارے گئے

یہاں تک کہ ان کے کٹے ہوئے سروں سے پشتہ بن گیا

دائیں، بائیں سے سیلاب کی طرح خون بہہ نکلا

پہاڑ در پہاڑ ہوا میں غبار اڑا

فتنوں کے بیج جو اس نے بوئے تھے

وہ ان کے لئے آفت سر بن گئے

اخروٹ ٹوٹے، اور جس میں گری تھی

مرنے کے بعد وہ ایک پاکیزہ اور عمدہ روح رکھتا تھا

مارنا اور مرنا جو جسم سے متعلق ہے

انار اور اخروٹ توڑنے کی طرح ہے

جو میٹھا ہے وہ قیمتی بنا

اور جو گلا، سڑا ہے وہ آواز کے علاوہ کچھ نہیں ہے

حقیقت واضح ہوجاتی ہے

باطل خود رسوا ہوجاتا ہے

اے صورت کے پجاری! جا معنیٰ کی کوشش کر

اس لئے کہ معنیٰ ظاہر کے جسم کے لئے پر ہیں

اہل باطن کا ہمنشیں بن تاکہ

انعام بھی پائے اور مرد بھی بنے

اس بدن میں بے معنیٰ جان ، یقینا

غلاف میں لکڑی کی تلوار کی طرح ہے

جب تک وہ غلاف میں ہو قیمتی ہے

جب باہر نکلی، جلانے کی چیز ہے

میدان جنگ میں لکڑی کی تلوار نہ لے جا

پہلے دیکھ لے تاکہ کام خراب نہ ہو

اگر وہ لکڑی کی ہے ، جا دوسری لے

اور اگر تیز تلوار ہے تو خوشی سے سامنے آئے

تلوار، اولیاء کے اسلحہ خانہ میں ہے

ان کا دیدار تمہارے لیے کیمیا ہے

تمام سمجھداروں نے یہی کہا ہے

کہ عقل مند دونوں جہاں کے لئے رحمت ہے

اگر تو انار خریدے، کھلا ہوا خرید

تا کہ کھلا ہونا اس کے دانہ کی بابت بتا دے

اس شخص کی مسکراہٹ بڑی مبارک ہے

جو موتی جیسا صاف اور آبدار جان ڈبیہ کی طرح دکھتا ہے

منحوس ہنسی اس گل لالہ کی تھی

جس کے منہ سے اس کے دل کی سیاہی ظاہر ہوگئی

مسکراتا انار، باغ کو مسکراتا بنا دیتا ہے

مردوں کی صحبت تجھے مردوں میں سے بنادے گی

اگر تو سنگِ خارہ اور سنگ مرمر ہو

جب صاحبِ دل کے پاس پہنچے گا تو موتی بن جائے گا

پاک لوگوں کی محبت جان میں بٹھالے

خوش دل لوگوں کی محبت کے علاوہ دل نہ دے

مایوسی کے کوچہ میں نہ جا ، کیونکہ امیدیں ہیں

اندھیرے کی طرف نہ جا سورج ہیں

دل تجھے اہل دل کے کوچہ کی طرف کھینچتا ہے

اور جسم تجھے پانی، مٹی کے قید خانہ کی طرف کھینچتا ہے

ہاں ! کسی دل والے سے (لیکر) دل کو خوراک دے

جا! کسی نصیبہ والے سے نصیب تلاش کر