الٰہی سوز و دل تشنہ لب ہوں

الٰہی سوز و دل تشنہ لب ہوں

جناب کبریا میں بے ادب ہوں

الٰہی من عرف کے باب سب کھول

مرے پر عشق کے آداب سب کھول

الٰہی پردہ کثرت اٹھا دے

شارب ساغر وحدت پلا دے

الٰہی لطف کر مت در بدر کر

گناہوں پر مرے مت یوں نظر کر

الٰہی بھیج تو بارانِ رحمت

گنہ گاروں پر اپنی کر شفقت

الٰہی مجھ کوں ہے امیدواری

کہ بخشے گا مجھے غفار باری

الٰہی عجز پر میرے کرم کر

نگاہ لطف مجھ پر دم بدم کر

الٰہی مجھ کوں دکھلا جلوۂ نور

مرا دل کر بہار شعلۂ طور

الٰہی غم میں جلتا ہے سراج آج

زلال وصل کا ہے تیرے محتاج