یہ شادی کا منظر ہے کیا پیارا پیارا

یہ شادی کا منظر ہے کیا پیارا پیارا

مبارک ہو تم کو خوشی کا نظارا

خوشی سے چمکتا ہے دولہا کا چہرہ

مبارک ہو شادی مبارک ہو سہرا

یہ پیغام دیتی ہیں سہرے کی لڑیاں

خدا نے دکھائیں مسرت کی گھڑیاں

عزیزوں کے دل کی کلی کھل گئی ہے

کہ باپ اور ماں کو بہو مل گئی ہے

لٹاتی ہے الفت خوشی کا خزانہ

بہارو ں نے چھیڑا ہے دلکش ترانہ

ملے ہیں مقدر سے کیا نیک دونوں

خدایا رہیں عمر بھر ایک دونوں

الٰہی انہیں اس طرح شاد رکھنا

محبت سے گھر ان کا آباد رکھنا

سدا چمکے دونوں کی قسمت کا تارا

یہ شادی کا منظر ہے کیا پیارا پیارا

کہو دوستو سے ہنسیں اور جھومیں

نگاہوں سے دولہا کے سہرے کو چومیں

مہکنے لگے پیار کے پھول ہر سو

رچی ہے دلوں میں محبت کی خوشبو

گلوں کے لبوں پر ہنسی کھیلتی ہے

تمناؤں سے زندگی کھیلتی ہے

ہے موجود عشرت کا سامان پورا

ہوا آج شادی کا ارمان پورا

کھلی ہے دلوں میں مسرت کی کلیاں

کہ ماں باپ بھائی بہن سب ہیں شادماں

ملا ہے یہ رشتہ بھی کیا پیارا پیارا

مبارک ہو تم کو خوشی کا نظارہ

یہ شادی کا۔۔۔

مبارک ہو شادی یہ دولہا دلہن کو

مبارک ہو دونوں کے بھائی بہن کو

خوشی کی گھڑی ہے خوشی کا سماں ہے

دلوں میں محبت کا عالم جواں ہے

ہیں مسرور اس وقت دولہا میاں بھی

یہی رنگ ہے اب دلہن کے یہاں بھی

دکھایا ہے دونوں کو یہ دن خدا نے

کہ بجتے ہیں دونوں کے گھر شادیانے

گھرانے پہ ان کے یہ لطف خدا ہے

خدا سے یہ انورؔ ہماری دعا ہے

بنیں دونوں ایک دوسرے کا سہارا

یہ شادی کا منظر ہے کیا پیارا پیارا