جس سے کہ بڑھے پیاس وہ پیمانہ ہے اس کا

جس سے کہ بڑھے پیاس وہ پیمانہ ہے اس کا

ہیں جس میں کہ سب مست وہ میخانہ ہے اس کا

عالم کی زباں پر یہی افسانہ ہے اس کا

حسنِ پری اک جلوۂ مستانہ ہے اس کا

ہشیار وہی ہے کہ جو دیوانہ ہے اس کا

ہر چند وہ ظاہر ہے مگر پھر بھی ہے روپوش

کیا تجھ کو خبر ہوش کی لے تو کہ ہے بیہوش

بے وجہ نہیں طائرِ زر چرخ پہ خاموش

گل آتے ہیں ہستی میں عدم سے ہمہ تن گوش

بلبل کا یہ نالہ نہیں افسانہ ہے اس کا

محبوب ہوئے اہل حشم اس کے حشم سے

ممنون ہوئے اہل کرم اس کے کرم سے

اس عقدۂ دشوار کو حل کر کہیں ہم سے

یوسف نہیں جو ہاتھ لگے چند درم سے

قیمت جو دو عالم کی ہے بیعانہ ہے اس کا

دیکھا نہیں اے عرش مگر مرتا ہے آتشؔ

دم خم نہیں گو اس میں یہ دم بھرتا ہے آتشؔ

حق یوں ہے کہ مرنے سے نہیں ڈرتا ہے آتشؔ

شکرانہ ساقی ازل کرتا ہے آتشؔ

لبریز مئے شوق سے پیمانہ ہے اس کا