سراپا ہیں رحمت حبیب_دو_عالم

سراپا ہیں رحمت حبیب دو عالم

وہی فخر انساں وہی فخر آدم

خدا ان کا محرم خدا کے وہ محرم

بھلا کون ہے ان کے ایسا معظم

کہ محبوب رب ہیں نبیٔ مکرم

انہیں کے کرم سے شبستاں ہے مسکن

انہیں کی مہک سے معطر ہے گلشن

مہ و شمس انجم انہیں سے ہیں روشن

انہیں کا ہے جلوہ ضیائے دو عالم

کہ ہیں نور یزداں نبیٔ مکرم

ستمگر زمانہ مخالف ہوائیں

فسانہ کسے بے بسی کا سنائیں

کہاں تک غم آرزو ہم چھپائیں

نہ کیوں ہو زباں پر یہی اپنی ہر دم

نظر ہو کرم کی نبیٔ مکرم

یوں عشق نبی اب دلوں میں بساؤ

کہ اپنے دلوں کو مدینہ بناؤ

غلامان آل نبی بن کے آؤ

ملیں گی تمہیں نعمتیں روز پیہم

کہ ہیں راحت جاں نبیٔ مکرم

سر عرش تنہا نبی کو بلایا

خدا نے انہیں اپنا مہماں بنایا

ملک حور و غلماں نے مژدہ سنایا

کہ ہے ان کے زیر قدم عرش اعظم

مبین بس وہی ہیں نبیٔ مکرم