شراب_ناب کی تقسیم ہو رہی ہوگی

شراب ناب کی تقسیم ہو رہی ہوگی

تو واعظ ہی کے ہاتھوں میں تھرتھری ہوگی

وہاں بھی بادہ پرستوں کی بن پڑی ہوگی

اناڑیوں سے نہ جنت میں مے کشی ہوگی

کھلاڑیوں ہی کے منہ سے یہ شئے لگی ہوگی

سرود عشق کے نغمے سنائے گا تمہیں دل

کبھی شراب محبت پلائے گا تمہیں دل

تم آزما چکے اب آزمائے گا تمہیں دل

بہار داغوں کی اپنی دکھائے گا تمہیں دل

یہ مور ناچے گا جب آگے مورنی ہوگی

حضور ساقیٔ کوثر ہر ایک درد آشام

کرے گا عرض بمنت کہ ہو عطا اک جام

یہ دیکھ کر کہ قدح خواروں کو ملا انعام

شراب مانگے زاہد تو ہم کہیں گے حرام

ملا جو یہ لب کوثر تو دل لگی ہوگی

نگاہ ناز تمہاری پسند ہے ہم کو

نظر فریب پہ برچھی پسند ہے ہم کو

یہ ابرار کٹاری پسند ہے ہم کو

تری نگاہ کی تیزی پسند ہے ہم کو

بس اب ہمارا گلا ہوگا یہ چھری ہوگی

نگاہ ہوش ربا ہائے کر گئی بے چپن

ٹپک جگر میں تو ہے ٹیس دل میں جی بے چپن

کرے گی اور زیادہ یہ اس گھڑی بے چپن

نظر ابھی سے ہے اس شوخ چشم کی بے چپن

جوانی آئی تو یہ اور چلبلی ہوگی

وہ شکل صفائے دل پر جو تھی کھنچی اکبر

وہ نور بن کے اب آنکھوں میں آ گئی اکبر

وہ بات نکلی زباں سے جو دل میں تھی اکبر

ہماری آنکھیں ہیں جھانکی کرشن کی اکبر

وہ شکل ان میں بسے گی جو سانولی ہوگی