کیا بیاں ہو صفت و شانِ رسول عربی

کیا بیاں ہو صفت و شانِ رسول عربی

ختم ہے آپ پہ سب طرح کی عالی نسبی

ایسا رتبہ ہے کہ دیکھو آپ کو ہر ایک نبی

یہی کہتا تھا بصد شوق زیارت طلبی

مرحبا سید مکی مدنی العربی

دل و جاں باد فدایت چہ عجیب خوش لقبی

شبِ معراج بفرمانِ خدائے دو جہاں

ہوئے آراستہ سب ارض و سما باغِ جناں

عرش و کرسی کو مزین کیا با عظمت و شاں

آئے جبرئیل حضوری میں یہ تھا وردِ زباں

مرحبا سید مکی مدنی العربی

دل و جاں باد فدایت چہ عجب خوش لقبی

شوقِ دیدار مبارک سے میں ہر لیل و نہار

صورتِ سایہ پڑا خاک پہ تھا زار و نزار

میرے رونے سے جو براق جناں تھے بیزار

میں دیدِ مبارک میں یہ کہتا ہر بار

مرحبا سید مکی مدنی العربی

دل وجاں باد فدایت چہ عجب خوش لقبی

فضلِ خالق سے نصیبا مرا بیدار ہوا

آج حاصل شرفِ دولتِ دیدار ہوا

میں تو ذرّہ تھا مگر مہرِ پُرانوار ہوا

اس سواری سے تفاخر کا سزاوار ہوا

مرحبا سیدِ مکی مدنی العربی

دل و جاں باد فدایت چہ عجب خوش لقبی

اب تمنائے دلی یہ مری باقی ہے حضور

حشر جب خلق میں کرنا ہو خدا کو منظور

میں سواری میں مشرف رہوں دن کو ضرور

تا قیامت غم فرقت میں رہوں گا رنجور

مرحبا سیدِ مکی مدنی العربی

دل و جاں باد فدایت چہ عجب خوش لقبی

اس کی تسکین جو فرما کے چلے شاہِ انام

جا کے اک دم سے کیا بیت مقدس میں قیام

انبیا اور رسل سب نے کیا جھک کے سلام

آکے اک ایک نے یوں دل کا سنایا پیغام

مرحبا سیدِ مکی مدنی العربی

دل و جاں باد فدایت چہ عجب خوش لقبی