اے نبی وصل خدا شان سے پانے والے

اے نبی وصل خدا شان سے پانے والے

لامکان اپنا مکان بنانے والے

قدرتِ حق کے کمالات دکھانے والے

ہو درود آپ پہ معراج کے جانے والے

آن کی آن میں پھر لوٹ کے آنے والے

عملِ خیر کا مشکل ہوا بننا ہم سے

بات بگڑی ہوئی بنتی ہے تمہارے دم سے

کیوں نہ آزاد رہیں ہم غمِ ہر عالم سے

رنج سے فکر سے آفت سے بلا سے غم سے

آپ ہیں امّتِ عاصی کے بچانے والے

آپ کے رخ سے عیاں ہے وہی جلوۂ حق کا

غش ہوئے دیکھتے ہی جس کو جناب موسیٰ

کھینچ سکتا ہے کوئی نورِ خدا کا نقشا

نقشۂ روئے پیمبر نہ کھنچا پر نہ کھنچا

متحیر ہوئے تصویر بنانے والے

تابعِ مرضیٔ اقدس ہوئے احکامِ قضا

آپ کے سامنے مردوں کا جلانا ہے کیا

بھر کے دم آپ کا عیسیٰ نے یہ پایا رتبا

آپ کی ذاتِ مقدس ہوئی فخرِ عیسیٰ

ہیں غلام آپ کے مردوں کو جِلانے والے

درگہِ حق سے مقدر ہے مرا آپ کے ہاتھ

میرے دارین کے مقصد ہیں شہا آپ کے ہاتھ

گو خطاوار ہوں ہے عفو خطا آپ کے ہاتھ

اس گنہگار کی ہے شرم و حیا آپ کے ہاتھ

میرے مولا مری بگڑی کے بنانے والے

شکر اس بندہ نوازی کا نہیں ہوسکتا

لاکھ جان ہوں تو کروں آپ پہ صدقے مولا

جب سے پیدا ہوا الطاف کے سایہ میں پلا

جو طلب میں نے کیا مجھ کو عنایت سے دیا

تیرے قربان مرے ناز اٹھانے والے

جائے پیدائش حضرت کو جو ہم پاویں گے

شوق سے چومیں گے اور سجدے میں جھک جاویں گے

آپ ارشاد مدینہ میں یہ فرماویں گے

بے تکلف سوئے فردوس چلے جاویں گے

کعبۃ اللہ کے جو لوگ ہیں جانے والے

آپ کی ایسی مبارک کو محبت ہووے

دور کثرت سے ہو واصلِ سوئے وحدت ہووے

ہر گھڑی پیشِ نظر آپ کی صورت ہووے

عشقِ مولا کا ہدایتؔ کو عنایت ہووے

خلق کو راہ ہدایت کی بتانے والے