نکالو عاشق_شیدا کے حوصلہ دل کا

نکالو عاشق شیدا کے حوصلہ دل کا

بہت دنوں سے شکایت ہے مشغلا دل کا

چرا کے آنکھ دکھاؤ نہ آبلہ دل کا

ادا سے دیکھ لو جاتا رہے گلہ دل کا

بس اک نگاہ پہ ٹھہرا ہے فیصلہ دل کا

نہ پوچھو دوستو ہم کس غضب میں رہتے ہیں

ستم اٹھاتے ہیں ان کی جفائیں سہتے ہیں

خموش رہتی ہیں آنکھوں سے اشک بہتے ہیں

وہ ظلم کرتے ہیں ہم پر تو لوگ کہتے ہیں

خدا برے سے نہ ڈالے معاملہ دل کا

کسی کی زلف کا مفتوں ہوں جوش وحشت ہے

قدم کو بیڑیوں کے گل سے استراحت ہے

جنوں میں طوق و سلاسل سے کس کو نفرت ہے

وہ رند ہوں کہ مجھے ہتھکڑی سے بیعت ہے

ملا ہے گیسوئے جاناں سے سلسلہ دل کا

شب فراق کا ہے طول مجھ پہ قہر و غضب

تڑپتا تھا دل وحشت زدہ برنج و تعب

کئی دنوں سے یہ سوجھا ہے کھیل مجھ کو اب

امید صبح میں کرتا ہوں چاک‌ دامن شب

جنوں میں روز نکالا ہے مشغلا دل کا

ادھر سے اجڑے ہوئے کارواں جو گزریں گے

ہر ایک اپنے مسافر کا ہم پتا دیں گے

نہ کب تلک دل گم گشتہ کی خبر لیں گے

پھرا جو کوچۂ قاتل سے کوئی پوچھیں گے

سنا ہے لٹ گیا رستے میں قافلہ دل کا

یہ فصل گل میں مقدر نے خار مجھ کو دیا

پھنسایا دام میں کھانے نہ دی چمن کی ہوا

پھرا نہ باغ میں دو روز بھی برنگ صبا

بہار آتے ہی کنج قفس نصیب ہوا

ہزار حیف کہ نکلا نہ حوصلہ دل کا

نمود عالم پیری ہے سر بہ سر اب یاں

ہوا ہے باغ جوانی میں دخل باد خزاں

عبث بہار چمن کا ہے حوصلہ ناداں

ہزار فصل گل آئے جنوں وہ جوش کہاں

گیا شباب کے ہمراہ ولولہ دل کا

فرار شور جگر سے بھلا مجھے کب ہے

تڑپ تڑپ کے گزاری فراق کی شب ہے

سوا ہے کل سے بھی کچھ درد کل نہیں اب ہے

خدا ہی خیر کرے آج رنگ بے ڈھب ہے

ٹپک رہا ہے کئی دن سے آبلہ دل کا

کبھی ہوئے نہ امانتؔ سے آئینہ رو صاف

سدا حسینوں نے کی بات اپنے دل کے خلاف

یہاں تو داد کسی نے نہ دی قصور معاف

خدا کے سامنے اپنا ہی اے خلق انصاف

بتوں سے حشر میں ہوگا مقابلہ دل کا