تمنا ہے تو میرا ارمان تو ہے

تمنا ہے تو میرا ارمان تو ہے

سلوک و ولایت کا عنوان تو ہے

مرا فقر تو میرا عرفان تو ہے

مرا دین تو میرا ایمان تو ہے

مری جان جس پر ہے قربان تو ہے

ھواللہ ربی و سبحانک اللہ

تجھی پر ہے ایمان الحمدلللہ

نگہباں رہے گا تو ان شاءاللہ

مرے دل کا دل ہے تو واللہ باللہ

مری جان کی جان اے جان تو ہے

بھٹکتا رہا ظلمتوں میں زمانہ

کسی نے نہ پایا ترا آستانہ

مجھی کو نظر آیا تیرا ٹھکانہ

اگر تجھ کو جانا تو میں نے ہی جانا

پھر اے دوست اس پر بھی انجان تو ہے

تو خود ہے پتنگا تو خود شمع آگیں

تو خود ہے چکورہ تو خود ماہ و پرویں

تو خود عشق ناکام خود حسنِ رنگیں

تو خود آئنیہ ہے تو خود آئینہ بیں

تماشہ یہ ہے آپ حیران تو ہے

وفاؔ جس کی خاھر تو پھرتا ہے در در

وہ پردہ نشیں ہے مرے دل کے اندر

تیرے پیر نے کہہ دیا سب یہ کہہ کر

جسے ڈھونڈتا پھر رہا ہے تو اکبر

مرے یار شکل اپنی پہچان تو ہے