KHudaya wo kaamil nazar de mujhe

ḳhudāyā vo kāmil nazar de mujhe

ki har ek zarra meñ dekhūñ tujhe

vo ġham de ki ho jaa.eñ sab ġham ġhalat

na ho aur kuchh tū-hī-tū ho faqat

agar ġharq-e-tūfāñ ho kul kā.ināt

na phisle magar merā pā-e-sabāt

rahe dhyān meñ kuchh na dozaḳh bahisht

terī diid ban jaa.e merī sarisht

mujhe rañg de paañv se tā-ba-farq

kHam-e-sibġhatullāh meñ kar ke ġharq

mere dil se zañg-e-duī duur kar

mere dil ko vahdat se mā'mūr kar

mile vahm-e-bātil nazar aa.e haq

paḌhūñ zarra-zarra se terā sabaq

tirī shaan pā.ūñ har andāz se

tirā lahja samjhūñ har āvāz se

chamak terī dekhūñ har ik rañg meñ

sunūñ raag terā har āhañg meñ

nigāhoñ meñ ho jalva-gar tū-hī-tū

har ik gul meñ pā.ūñ terī rañg-o-bū

karūñ fahm tujh ko har ik baat se

sunūñ terā naġhma jamādāt se

tirā jalva bāda-e-'ishq se ho ke mast

sunūñ gosh-e-jāñ se nidā-e-alast

kahūñ meñ balā aur ho jā.ūñ lā

mohabbat kī ātish se mujh ko jalā

kahūñ aur sunūñ aur banūñ chashm-o-gosh

merī be-ḳhudī par hoñ qurbān-e-hosh

mohabbat ke dariyā meñ mujh ko Dubo

tamannā hai ye ab to jo ho so ho

KHudaya wo kaamil nazar de mujhe

ki har ek zarra mein dekhun tujhe

wo gham de ki ho jaen sab gham ghalat

na ho aur kuchh tu-hi-tu ho faqat

agar gharq-e-tufan ho kul kainat

na phisle magar mera pa-e-sabaat

rahe dhyan mein kuchh na dozaKH bahisht

teri did ban jae meri sarisht

mujhe rang de panw se ta-ba-farq

kHam-e-sibghatullah mein kar ke gharq

mere dil se zang-e-dui dur kar

mere dil ko wahdat se ma'mur kar

mile wahm-e-baatil nazar aae haq

paDhun zarra-zarra se tera sabaq

teri shan paun har andaz se

tera lahja samjhun har aawaz se

chamak teri dekhun har ek rang mein

sunun rag tera har aahang mein

nigahon mein ho jalwa-gar tu-hi-tu

har ek gul mein paun teri rang-o-bu

karun fahm tujh ko har ek baat se

sunun tera naghma jamadat se

tera jalwa baada-e-'ishq se ho ke mast

sunun gosh-e-jaan se nida-e-alast

kahun mein bala aur ho jaun la

mohabbat ki aatish se mujh ko jala

kahun aur sunun aur banun chashm-o-gosh

meri be-KHudi par hon qurban-e-hosh

mohabbat ke dariya mein mujh ko Dubo

tamanna hai ye ab to jo ho so ho