خدایا وہ کامل نظر دے مجھے

خدایا وہ کامل نظر دے مجھے

کہ ہر ایک ذرہ میں دیکھوں تجھے

وہ غم دے کہ ہو جائیں سب غم غلط

نہ ہو اور کچھ تو ہی تو ہو فقط

اگر غرق طوفاں ہو کل کائنات

نہ پھسلے مگر میرا پاۓ ثبات

رہے دھیان میں کچھ نہ دوزخ بہشت

تیری دید بن جائے میری سرشت

مجھے رنگ دے پاؤں سے تا بہ فرق

خم صبغۃ اللہ میں کر کے غرق

میرے دل سے زنگ دوئی دور کر

میرے دل کو وحدت سے معمور کر

ملے وہم باطل نظر آئے حق

پڑھوں ذرہ ذرہ سے تیرا سبق

تری شان پاؤں ہر انداز سے

ترا لہجہ سمجھوں ہر آواز سے

چمک تیری دیکھوں ہر اک رنگ میں

سنوں راگ تیرا ہر آہنگ میں

نگاہوں میں ہو جلوہ گر تو ہی تو

ہر اک گل میں پاؤں تیری رنگ و بو

کروں فہم تجھ کو ہر اک بات سے

سنوں تیرا نغمہ جمادات سے

ترا جلوہ بادۂ عشق سے ہو کے مست

سنوں گوش جاں سے ندائے الست

کہوں میں بلا اور ہو جاؤں لا

محبت کی آتش سے مجھ کو جلا

کہوں اور سنوں اور بنوں چشم و گوش

میری بے خودی پر ہوں قربان ہوش

محبت کے دریا میں مجھ کو ڈبو

تمنا ہے یہ اب تو جو ہو سو ہو