نظم گرونانک اور گروبانی:گھٹا معصیت کی جو عالم پہ چھائی

گھٹا معصیت کی جو عالم پہ چھائی

تو نانک مجاہد نے بانی سنائی

حقائق کی دھن اور توحید کی لے

زباں سے نکلتے ہی دل میں سمائی

جگا ہی دیا جس نے خوابیدہ جگ کو

بڑی پراثر تھی وہ نغمہ سرائی

جگت کا گرو اور درویشِ کامل

ہر اک بات اچھی ہے اس نے بتائی

وہ پرنور چہرہ وہ ریشِ مبارک

جلالی جمالی چمک جن پہ آئی

ہنود اور مسلم ثناخواں ہیں کیا کیا

شریک عقیدت ہوئے دونوں بھائی

موحد ہے عارف ہے پیارا ہے نانک

مری آنکھ کا کیفؔ تارا ہے نانک