"پردیسی کی فریاد":اے موجِ صبا کچھ حال سنا اس دیس کے رہنے والوں کا

اے موجِ صبا کچھ حال سنا اس دیس کے رہنے والوں کا

وہ دیس جہاں کی خاک بھی ہے آنکھوں میں لگانے کے قابل

وہ دیس جہاں کا ہر ذرہ ہے ایک عبادت خانہ دل

وہ میرے خیالوں کی جنت وہ میری امیدوں کا حاصل

وہ میری مرادوں کا مرکز وہ میرے ارادوں کی منزل

اے موجِ صبا کچھ حال سنا اس دیس کے رہنے والوں کا

وہ دیس جہاں طفلی کی بہاریں روشن ور قصاں گذری ہیں

وہ دیس جہاں غم کی گھڑیاں صد رنگ بداماں گذری ہیں

وہ دیس جہاں میری راتیں سرشار وغزلخواں گذری ہیں

وہ دیس جہاں میری صبحیں مسرور ودرخشاں گذری ہیں

اے موجِ صبا کچھ حال سنا اس دیس کے رہنے والوں کا

وہ دیس جہاں ندی کے کنارے پہروں کھیلا کرتا تھا

کس شوق سے پانی کی لہروں کے رقص کو دیکھا کرتا تھا

مہتاب سلانے آتا تھا خورشید جگایا کرتا تھا

ہستی کے ستم سے ناواقف جینے کی تمنّا کرتا تھا

اے موجِ صبا کچھ حال سنا اس دیس کے رہنے والوں کا

وہ دیس فضاؤں میں جس کی سرشار جوانی آئی تھی

وہ دیس جہاں دل میں الفت کی پہلی کرن تھّرائی تھی

وہ دیس جہاں اک شوخ نظر پیغامِ حرارت لائی تھی

رگ رگ میں نہاں اک درد سا تھا اک چوٹ سی دل پر کھائی تھی

اے موجِ صبا کچھ حال سنا اس دیس کے رہنے والوں کا

وہ دیس جہاں بیکار تھیں سب ہستی کی ستم پرورگھاتیں

دلچسپ وہ باغوں کی سیریں دل کش وہ سہانی برساتیں

گھنگور گھٹاؤں کا اٹھنا ساغر کی کھنک سر خوش باتیں

اللہ کدھر پنہاں ہیں وہ دن اللہ کہاں ہیں وہ راتیں

اے موجِ صبا کچھ حال سنا اس دیس کے رہنے والوں کا

ہاں کچھ تو سنا اے روحوں کو پیغام طرب دینے والی

مانا کہ فضائے گیتی میں ہے کھیل دلوں کی پامالی

مانا کہ زمانہ ہے یکسر انوارِ محبت سے خالی

مانا کہ نہیں دنیا میں گراں یاروں پہ کسی کی بے حالی

اے موجِ صبا کچھ حال سنا اس دیس کے رہنے والوں کا

لللہ بتا مجھ بیکس کو یاران وطن کیا بھول گئے

پردیس کا عالم ہوتا ہے کس درجہ غم افزا بھول گئے

مدت سے ہے اک آوارہ وطن محروم تمنا بھول گئے

آتا ہوں کسی کو یاد بھی میں سب مجھ کو وہاں یا بھول گئے

اے موجِ صبا کچھ حال سنا اس دیس کے رہنے والوں کا

کہنا تمہارے ساتھی کو دنیا کے ستم نے لوٹ لیا

پردیس میں پیہم ناکامی کے رنج والم نے لوٹ لیا

ہستی کی متاعِ عشرت کو بے مہریٔ غم نے لوٹ لیا

امید کو نا امیدی کے احساسِ اتم نے لوٹ لیا

اے موجِ صبا کچھ حال سنا اس دیس کے رہنے والوں کا

گھنگھور گھٹائیں آتی ہیں وہ منہ اشکوں سے دھوتا ہے

غنچے تبسم ہوتے ہیں وہ سر دھنتا جاں کھوتا ہے

تم محوِ فغاں پاؤ گے اسے جب ذرہ ذرہ سوتا ہے

روتوں کو ہنساتاتھا جو کبھی دن رات پڑا اب روتا ہے

اے موجِ صبا کچھ حال سنا اس دیس کے رہنے والوں کا