آج یہ محسوس ہوتا ہے جہاں آزاد ہے

آج یہ محسوس ہوتا ہے جہاں آزاد ہے

یہ زمیں آزاد ہے یہ آسماں آزاد ہے

آج چھوٹے ہیں طلسم قید افرنگی سے ہم

آج اپنی آرزوؤں کی زباں آزاد ہے

چومتی ہے منزلِ مقصد مسافر کے قدم

آج گرد کارواں سے کارواں آزاد ہے

صید اور صیاد دونوں ہوگئے ہیں مطمئن

در قفس کے کھل گئے ہیں پاسباں آزاد ہے

نغمہ سنجان چمن کو مژدہ ہو آئی بہار

باغباں خود کہہ رہا ہے گلستاں آزادا ہے

دیکھتا ہوں رونقیں کونین کی بکھری ہوئی

ہر فضا آزاد ہے ہر آسماں آزاد ہے

دل نشاطِ رنگ وبو میں آج ہے ڈوبا ہوا

اب وطن مثلِ نسیم بوستاں آزاد ہے

خوں شہیدانِ وطن کا رنگ لاکر ہی رہا

آج یہ جنت نشاں ہندوستاں آزاد ہے