bolta quran

ḳhaak par nūr-e-ḳhudā jism meñ Dhal kar utrā

ek qur.ān-e-ḳhad-o-ḳhāl bhī ham par utrā

na.e rañgoñ se murattab sahar-o-shām hue

chashm-e-kaunain meñ bīnā.ī kā paikar utrā

kis qadar ājiz-o-miskīñ thī bulandī us kī

kursī-e-arsh liye ġhaar ke andar utrā

itnī ūñchā.iyoñ pe naqsh-e-qadam haiñ kis ke

itnī gahrā.iyoñ meñ kaun shināvar utrā

yuuñ huī ruuh ko mahsūs mohabbat us kī

jaise āġhosh meñ dariyā ke samundar utrā

jab kabhī tan kī muñDeroñ se uḌāyā hai use

tā.ir-e-dil isī dīvār ke uupar utrā

rahmateñ ā.eñgī sau rañg chhiḌakne ke liye

merī tauba kā jo chehra sar-e-mahshar utrā

us ke qadmoñ se tasavvur bhī huā duur agar

yuuñ lagā taḳht se jis tarh 'muzaffar' utrā

KHak par nur-e-KHuda jism mein Dhal kar utra

ek quran-e-KHad-o-KHal bhi hum par utra

nae rangon se murattab sahar-o-sham hue

chashm-e-kaunain mein binai ka paikar utra

kis qadar aajiz-o-miskin thi bulandi us ki

kursi-e-arsh liye ghaar ke andar utra

itni unchaiyon pe naqsh-e-qadam hain kis ke

itni gahraiyon mein kaun shinawar utra

yun hui ruh ko mahsus mohabbat us ki

jaise aaghosh mein dariya ke samundar utra

jab kabhi tan ki munDeron se uDaya hai use

tair-e-dil isi diwar ke upar utra

rahmaten aaengi sau rang chhiDakne ke liye

meri tauba ka jo chehra sar-e-mahshar utra

us ke qadmon se tasawwur bhi hua dur agar

yun laga taKHt se jis tarh 'muzaffar' utra