انجام ہستی:مژگاں سے کیوں مسلسل اشکوں کی ہے روانی

مژگاں سے کیوں مسلسل اشکوں کی ہے روانی

ہے سامنے نظر کے انجامِ دہر فانی

یہ انحطاط پیری یہ طفلی یہ جوانی

ہیں مستقل ثبوت معیارِ زندگانی

خود انقلابِ ہستی اعلان ہے فنا کا

یہ سانس آتی جاتی جھونکا ہے اک ہوا کا

نقد ونظر سے تیرا ہے قلب تنگ پایہ

تونے گرادیا ہے ہستی کا اپنی پایہ

باوصف چشمِ بینا تجھ کو نظر نہ آیا

تیرا وجود خود ہے ڈھلتا سا ایک سایہ

سایہ کی ہو حقیقت کس طرح اعتباری

اک حال پر نہیں جب اس کو استواری

ضو باریاں تو دیکھی ہیں نیر سحر کی

جلوہ گری ہے جس سے ہر ایک بحرو بر کی

بطن صدف میں اس سے تزئین ہے گہر کی

مشاطہ ہر کرن ہے گل ہائے شاخ تر کی

وقت زوال لیکن ہے سوئے غرب عازم

صبح طلوع کو ہے شامِ غروب لازم

دیکھا فلک کے تونے رخسارِ ضوفشاں کو

رنگینیوں پہ جس کی ہے ناز آسماں کو

گل پوش کررہا ہے نظارۂ جہاں کو

روکے گا کون لیکن اس جاتے میہماں کو

تحلیل ظلمتوں میں اب ہوگی اس کی ہستی

گویا کہ اوج اس کا ہے ہم کنار بستی

انجم نہیں فلک پر پھولوں کی انجمن ہے

ضو باریوں میں جس کی فطرت کا بانکپن ہے

نسریں ہے کوئی اس میں اور کوئی نسترن ہے

لبریز حسن جس سے یہ طارم کہن ہے

دست سحر کا لیکن جب ظلم ان پہ ٹوٹا

سطح فلک کے اوپر گل ہے نہ کوئی بوٹا

جو پھولوں کی عروس نوخیز رنگ وبو تھے

جان عزیز بلبل گلشن کی آبرو تھے

آرائشِ چمن تھے تاج سر نمو تھے

دیکھا جو آج ان کو آوارہ چار سو تھے

وہ آشیانہ اب ہے وہ شاخسار باقی

ان کی جگہ بگولے ہیں اور خار باقی

ہر چیز اس جہاں کی آمادۂ فنا ہے

کوئی ہے چلنے والا اور کوئی چل بسا ہے

شور درانہ کوئی غوغاے راحلہ ہے

بس یوں ہی آگے پیچھے یہ سارا قافلہ ہے

خاموش جارہے ہیں سب قافلے عدم کے

ملتے نہیں کسی جا آثار بھی قدم کے