ہوا پھر شیعہ و سنی میں جھگڑا

ہوا پھر شیعہ و سنی میں جھگڑا

زمیں سے چرخ تک پہنچا قضیہ

یہ دونوں کلمہ گو ہیں واہ واہ

خدا دکھلائے ان کو دیں کی راہ

ہوا دنگا یہ شہر لکھنؤ میں

نہ آئے فرق کیوں کر آبرو میں

مسلماں دونوں پھر باہم نفاق آہ

کدھر ڈھونڈھیں تجھے اے اتفاق آہ

ہماری خوبیٔ تقدیر دیکھو

چلی آپس میں ہی شمشیر دیکھو

جو مل جل کر یہ دونوں بھائی رہتے

نہ ہم اس طرح کی ایذائیں دیتے

ہمارا ان کا قبلہ ایک دیں ایک

مکاں دونوں کا واحد ہے مکیں ایک

خدا ہے ایک دونوں کا رسولؐ ایک

تو ہے بے شبہ پھر اصل الاصول ایک

ہماری اور ان کی ہے کتاب ایک

سوال قبر واحد ہے جواب ایک

پھر اس پر کس قیامت کا ہے کینہ

بنے ہیں دونوں سنگ و آبگینہ

ہمیں لڑ بھڑ کے جب ہو جائیں گے چور

تو دشمن ہوگا ہم پر کیوں نہ منصور

خدایا دونوں کے دل صاف کر دے

عداوت کی جگہ الفت کو بھر دے

ہماری ان کی حالت ایک ہو جائے

ہماری ان کی نیت ایک ہو جائے

کہیں آمین دل سے دونوں بھائی

بحمد اللہ کہ ہوتی ہے صفائی