"نوجوانوں سے خطاب" :نفس نفس میں نیا انقلاب پیدا کر

نفس نفس میں نیا انقلاب پیدا کر

شباب ہے تو بہار شباب پیدا کر

جگر کے سوز میں پھر التہاب پیدا کر

ہر ایک داغ سے اک آفتاب پیدا کر

ثواب کے لیے زاہد کو محو رہنے دے

عذاب ہی میں تو ذوق ثواب پیدا کر

کھلا سکے نہ ہوائے بہار بھی جس کو

وہ خارزار خزاں سے گلاب پیدا کر

جو کھینچتے ہیں ترے خون سے مئے گل رنگ

تو ان کے خون سے رنگیں شراب پیدا کر

سنا رہا ہے عبث داستانِ خواب آور

زمانہ چیخ اٹھے وہ خطاب پیدا کر

کچھ امتیاز نہ رکھیں جو دیر وکعبہ میں

کچھ ایسے بےخود وخانہ خراب پیدا کر

جو زندگی سے عبارت ہے انقلاب فقط

تو ہر قدم پہ نیا انقلاب پیدا کر

نظر نظر سے ترے بجلیاں برستی ہوں

وہ دل وہ زر وہ رنگ شباب پیدا کر

زمانہ یوں تری فریاد کو نہ سمجھے گا

زبان تیغ سے رنگیں خطاب پیدا کر

جو چاہتا ہے تو سالار کارواں بننا

قدم میں جرأت مست شباب پیدا کر

پلٹ دے جو رخ آئین دہر کو یکسر

اس انقلاب سے وہ انقلاب پیدا کر

شہید ملت و دیں کے لئے نہ رو عرشیؔ

جو تجھ سے ہوسکے اس کا جواب پیدا کر