" رقص بہار":پھر ہے چمن میں جشنِ بہاراں

پھر ہے چمن میں جشنِ بہاراں

پھول شگفتہ کانٹے خنداں

پتی پتی نور بہ داماں

ذرہ ذرہ مہر درخشاں

کچھ نہیں فکر برق وباراں

اب ہے ہماے بس میں گلستاں

شکر خدا آزاد ہوئے ہم

پورے ہوگئے دل کے ارماں

خوش ہیں وطن کے رہنے والے

شاد دلوں میں گبرومسلماں

بزم مرتب جام وسبو سے

رند ہیں شاداں ساغر رقصاں

جھوم کے اٹھے کالے بادل

ٹوٹ کے برسا ابر بہاراں

اہل وطن پر کیف کا عالم

غنچہ غنچہ خلد بہ داماں

ساز چھڑا ہے عیش وطرب کا

مرغ چمن ہیں آج غزلخواں

ساز بکف ہے مطرب رنگیں

برلب بربط نفخۂ رقصاں

ٹوٹا طلسم عہدِ غلامی

سونا پڑا ہے قصر ِزنداں

بادہ شبنم گل کے ساغر

حسن بہاراں جانِ بہاراں

عزم راسخ سعیٔ پیہم

زندہ باد اے ہمتِ مرداں

رنگ بہاراں دیکھ کے اسلمؔ

جاگ اٹھے ہیں دل کے ارماں