jogi-nama
safa-e-rūh pe terī ḳhūbī-e-ḳhat kī hai phaban
hai suvaidā tire āshiq kā terā ḳhāl-e-zaqan
rashk-e-gul dast-e-hinā.ī ki kahe dekh chaman
ho raqam kis qalam-e-shauq se ai ġhuncha-e-dahan
ishtiyāqe ki ba-dīdār to dārad dil-e-man
ab jo mil jaaye kahīñ vo to ye ham us se kaheñ
kab talak dard-e-judā.ī ko bhalā tere saheñ
itnā bhī bas nahīñ ai yaar ki ham mar hī raheñ
duur jis dan se huā tujh chaman-e-husn-e-sīmīñ
na mujhe baaġh ḳhush aatā hai na gulshan-e-chaman
bed-e-majnūñ haiñ ki maiñ taak pareshāñ-ḳhātir
yā haiñ ḳhākistar-e-ḳhāshāk pareshāñ-ḳhātir
ham-ġharz aise haiñ ġhamnāk pareshāñ-ḳhātir
chashm-e-namnāk jigar-chāk pareshāñ-ḳhātir
chaak par chaak garebāñ se lagātā dāman
jor aur zulm se us ke na kabhī ghabrānā
na kabhī shikva-e-bedād zabāñ par laanā
kaam hargiz na kisī se nahīñ ānā-jānā
koī kuchh pūchhe to muñh dekh ke chup rah jaanā
na takallum na ishārat na hikāyat na suḳhan
yaad us shoḳh kī kyā kyā hī sitam laatī hai
jaan bechainī se tan meñ mire ghabrātī hai
aah kartā huuñ to bijlī sī nikal aatī hai
jab maiñ rotā huuñ to āñkhoñ se baras jaatī hai
kabhī sāvan kī jhaḌī aur kabhī bhādoñ kī bharan
dasht aur koh meñ vahshī sā paḌā phirtā huuñ
barq kī tarh se betāb sadā phirtā huuñ
maiñ ġharaz tujh se sanam jab se judā phirtā huuñ
rāt-din hijar meñ jogī sā banā phirtā huuñ
be-qarārī se tire naam kī japtā sumran
jor aur zulm mire dal ne hazāroñ hī sahe
shikva-e-jor bhalā terā kahāñ tak na kare
ab to ye haal huā hijar meñ ai yaar mare
dosh par bār-e-alam kānoñ meñ ġham ke mundre
ashkoñ ke taar gale meñ paḌe selī ke naman
ishaq meñ jogī hue jab se hameñ bhaa.ī bhabūt
baiThe dar par tere aur guru hai phailā.ī bhabūt
dekh Tuk aan ke kis ruup meñ rañg laa.ī bhabūt
pairahan gerua aur tan ke upar chhā.ī bhabūt
sar se le pā.ūñ talak ḳhaak malī sau sau man
guh dar-e-ka.aba pe peshānī ko apnī ghisnā
gaah masjid meñ miyāñ māñgnā jā-jā ke duā
inkisārī se kabhī der meñ har-dam jaanā
dam-ba-dam aah kī pūñgī se bajānā ye sadā
dekhiye kaun sī din har hameñ deñge darshan
dekhā mere ta.iiñ jo tan ke upar gul khaa.e
aur kapḌe bhī rañge geruve tan par paa.e
dekh ye haal ta.ajjub se bashar ghabrā.e
koī kahtā hai ki jogī-jī kidhar ko aa.e
sach kaho kaun sī nagrī meñ tumhārā hai vatan
yaad karte ho use naam usī kā le le
aur zebā haiñ bahut aap ke tan par siile
vo jogī bhī bane ḳhuub ho tum albele
kaun se panth meñ ho kaun guru ke chele
kaun se ruup meñ ho kaun sā rakhte ho baran
ham ko jogī-jī batā dījiye ye haal apnā
tum jo bai-rāgī bane is meñ nafā kyā hai bhalā
aur murshid se tumhāre hai tumheñ kyā pahūñchā
naam kyā jog meñ hai tum ko guru ne baḳhshā
dhyān kyā rakhte ho kis gyaan kā rakhte ho chalan
durr-e-shahvār jalā kar jo banā.ī hai bhabūt
aur kyuuñ tum batāo ye ḳhush aa.ī hai bhabūt
ishaq meñ kis ke ye ab tan pe ramā.ī hai bhabūt
kis liye muñh ke upar tum ne lagā.ī hai bhabūt
kis kī ulfat meñ ye bairāg kā pahnā abran
kis liye jog liyā aur rañgā kapḌoñ ko
kis pe āshiq ho diyā rañj ye kis ne tum ko
kyuuñ kar auqāt basar hotī hai ye ham se kaho
kyā alam khāte ho aur kis kī talab rakhte ho
dhvanī jal-pān bhī yā yuuñ hī karoge lañghan
naam paiġhambaroñ ke kafnī pe likhe saare
aur garebāñ meñ haiñ naam ḳhudā ke likhe
tum to kāmil se nazar aate ho apne lekhe
ham ne jogī to bahut yuuñ haiñ hazāroñ dekhe
par tumhārā to zamāne se nirālā hai chalan
ham ne duniyā meñ ajī saikḌoñ dekhe jogī
dekhe har rañg ke har ek baran ke jogī
par arz tum se nahīñ dekhe haiñ ham ne jogī
tum to aate ho nazar ham ko na.e se jogī
sach kaho jog liyā tum ne ye kis ke kāran
kyā huā jogī-jī tum ko bhalā ham se to kaho
kyuuñ ḳhajil ḳhvār paḌe phirte ho muñh se bolo
kis liye vahshī se phirte ho batāo ham ko
kis kī hai yaad tumheñ kis ke liye phirte ho
ab kahīñ baiThoge yā yuuñ hī phiroge ban ban
kis liye ghar se tum aa.e ho bhalā apne nikal
phirte mānind-e-sabā kyuuñ ho ba-dasht-o-jañgal
tum se ik baat kahūñ us pe agar kiije amal
gar kaaro hukm to banvā deñ tumhārā asthal
shahar meñ baaġh meñ yaar lab-e-dariyā-e-jaman
yā kahīñ aur batāo ki jahāñ aap raheñ
yā to jañgal meñ agar dil lage ye aap kaheñ
yā ki asthal ke banā dene kī tajvīz kareñ
yā ki mathurā jo pasand aave to vaañ jāgah leñ
yā kadar ban meñ ho yā maat mahā bindrāban
aur agar yuuñ hī phiroge to ye hai mushkil saḳht
asthal ik ham jo banā deñ to zahe apne baḳht
us meñ achchhā sā bichhā deveñ tumhāre liye taḳht
ḳhāse phūloñ ke lagā deveñ us asthal meñ daraḳht
jis se āñkhoñ ko tarāvat rahe aur dil ho magan
ab to jogī-jī kahā maan lo ye tum merā
ek jā baiTh raho aur kaaro ham pe dayā
mat phiro yuuñ ḳhajil-o-ḳhvār ba-dasht-o-sahrā
jab to sun sun ke ye ham ne kahā us se baabā
tujh ko kyā kaam faqīroñ se ye karnā an-ban
kyā garaj tujh ko jo pūchhe hai tū ahvāl mirā
jog kī pūchhe to bas ishaq meñ ye jog liyā
aur us kī hī judā.ī meñ phire haiñ har jā
aur vatan pūchhe hamārā to ye sun rakh baabā
yā galī dost kī yā yaar ke ghar kā āñgan
misl-e-sarsar usī kūche meñ phirā karte haiñ
dekh darvāze ko bas shaad huā karte haiñ
ḳhūn-e-dil jā-e-mai-e-nāb piyā karte haiñ
is ke kūche meñ sadā mast rahā karte haiñ
vahī bastī vahī nagrī vahī jañgal vahī ban
gaate phirte haiñ sadā biin liye kāñdhe pe giit
jo atītoñ kī hai muddat se vahī apnī riit
mahv pītam ke haiñ jab se ki lagī us kī piit
panth kī pūchhe to jogī na janm ke na atiit
ishaq ke mel meñ ham pem kā rakhte haiñ baran
aa mile dil meñ jo ulfat ke the so phuuT ga.e
jitnā thā maal mirā tab use le luuT ga.e
aqrabā dost the jitne vo bhī chhūT ga.e
jab se is shoḳh ke phande meñ phañse TuuT ga.e
jitne the maz.hab-o-millat ke jahāñ meñ bandhan
ishq meñ chhoḌ ke ham duniyā-o-dīñ baiThe haiñ
ḳhātir-e-āshufta-o-dil-gīr-o-hazīñ baiThe haiñ
chhoḌ sab aish jahāñ gosha-guzīñ baiThe haiñ
us ke ham dar pe muñDā sar ke ta.iiñ baiThe haiñ
rāt-din piite haiñ dho dho ke usī ke gur ke charan
ḳhanjar-e-ishq se bas apnā kalejā hai shaq
ye to zāhir hai nishāñ muñh kā bhī jo rañg hai faq
ḳhuuñ meñ ālūda haiñ zaḳhmī haiñ ki juuñ rañg-e-shafaq
naam ko pūchhe to hai naam hamārā āshiq
sab se āzād hue yaar kā le dāman
haal bebākī kā kyā apnī bhalā tujh se kaheñ
gar raheñ bhūke to hargiz bhī kabhī ġham na kareñ
aur khāne ko mile to bhī na kuchh shaad raheñ
gar raheñ jiite to jiine kī nahīñ fikr hameñ
aur mar jaa.eñ to hargiz nahīñ parvā-e-kafan
dekh nairañgī zamāne kī hue gil-dar-gil
aur mal tan ko bhabūt apne ga.e ḳhaak meñ mil
kapḌe rañgne ko tū āsān na jaan o ġhāfil
rañg vo rañgte haiñ jis rañg kā rañgnā mushkil
ruup bharte haiñ jis ruup kā bharnā hai kaThin
chhoḌā jannat ko jo aadam ne usī kī ḳhātir
aur har ek ke kī dam ne usī kī ḳhātir
jī meñ kī apne ḳhushī ġham ne usī kī ḳhātir
jog bairāg liyā ham ne usī kī ḳhātir
sab ke ta.iiñ chhoḌ usī kī hai atā kī lagan
rañge kapḌoñ se na kar ham pe tū jogī kā gumān
ham ne kyā jaane kiyā kis liye aisā sāmān
gar tū aaqil hai to phir dil hī meñ apne pahchān
ham meñ aur jogī kī sūrat meñ baḌā farq hai jaan
kahāñ se jogī kī adā aur kahāñ āshiq kī phaban
ātish-e-ġham se jalā jab se jalāyā dil-o-jān
tab ye iksīr milī ham ko tū shak is meñ na jaan
tū to aaqil hai bas ab aqal se apnī pahchān
ḳhaak hai yaar ke kūche kī bhabūt ab har aan
ham ne bhī raakh banā.ī hai jalā kar tan-man
surḳh āñkhoñ kā jo pūchhe hai ki baa.is hai kahā
shauq mai kā nahīñ kuchh zauq nahīñ afyūn kā
qadah bañg se na ishaq kabhī ham ko huā
hai atā ke dhatūrē kā jo āñkhoñ meñ nashā
us kī garmī hī se rahte haiñ sadā surḳh nain
koī monis hai na ġham-ḳhvār na hai sañg na saat
rahtā havan rañj meñ mashġhūl sadā din aur raat
ab ḳhudā jaane ki kis tarh kaTegī auqāt
aur asthal ke banāne kī kahī tū ne jo baat
ye bakheḌā vo kare jis ke kane ho kuchh dhan
ishaq jab se ki huā hai hameñ us achpal se
jab se betāb phirā karte haiñ aur bekal se
ham se bekal bhī nahīñ baiThe haiñ ik jā kal se
ham faqīroñ ko bhalā kaam hai kyā asthal se
vahī asthal hai jahāñ maar ke baiThe aasan
ḳhvāhish-e-zar na kareñ aur na kisī se māñgaiñ
taḳht aur chatr kī bhī kuchh nahīñ parvā hai hameñ
gokul aur mathurā ke rahne kī nahīñ hirs kareñ
jā paḌeñ yaad meñ us shoḳh kī jis bastī meñ
vahī goggle hai hameñ aur vahī hai bindrāban
jab se jogī hue dī us ko matā-e-dil-o-jāñ
chhoḌ baiThe bhī ārām kā jo thā sāmāñ
hājat-e-takiya hai ne ḳhvāhish-e-bistar na makāñ
jā paḌe kaak pe rakh sar ke tale haath jahāñ
hai vahī farsh vahī taḳht vahī singhāsan
hai ḳhayāl us gul-e-ruḳhsār kā har shām-o-pagāh
bāġh-bāġhīche kī hargiz hai nahīñ ham ko chaah
chaah hai chāh-e-zaqan kī nahīñ darkār hai chaah
phūl-phulvārī kī bhī jab se nahīñ kuchh parvāh
jab se gul khā ke atā meñ jalāyā hai badan
rahtā huuñ muztar-o-maġhmūm maiñ har-dam har-ān
hosh-e-gum-karda phirā kartā huuñ aur be-sāmān
baaz aa zulm se aur jor se tū haq ko maan
ab to is haal ko pahūñchā huuñ tire hijar meñ jaañ
ai gul-bāġh-e-vafā dil ke chaman ke gulshan
kahīñ kahtā hai jo ahvāl mirā koī zarā
sar ko dhuntā hai har ek pīr-o-javāñ aur laḌkā
ghar meñ rahtā huuñ to rotā hai har-ik ḳhvesh apnā
ghar se bāhar jo nikaltā huuñ to muñh dekh merā
mire ahvāl pe bhī rote haiñ jañgal meñ hiran
ḳhātir-āshufta maiñ phirtā huuñ hazīn-o-dil-gīr
ishq meñ us ke sabhī kho chukā izz-o-tauqīr
phirtā huuñ galiyoñ meñ dīvāna sā har rose zarīr
kyā likhūñ ab to guzartī hai jo kuchh mujh pe 'nazīr'
dil-e-man dānad va man dānam va dānad dil-e-man
safa-e-ruh pe teri KHubi-e-KHat ki hai phaban
hai suwaida tere aashiq ka tera KHal-e-zaqan
rashk-e-gul dast-e-hinai ki kahe dekh chaman
ho raqam kis qalam-e-shauq se ai ghuncha-e-dahan
ishtiyaqe ki ba-didar to darad dil-e-man
ab jo mil jaye kahin wo to ye hum us se kahen
kab talak dard-e-judai ko bhala tere sahen
itna bhi bas nahin ai yar ki hum mar hi rahen
dur jis dan se hua tujh chaman-e-husn-e-simin
na mujhe bagh KHush aata hai na gulshan-e-chaman
bed-e-majnun hain ki main tak pareshan-KHatir
yā hain KHakistar-e-KHashak pareshan-KHatir
ham-gharz aise hain ghamnak pareshan-KHatir
chashm-e-namnak jigar-chaak pareshan-KHatir
chaak par chaak gareban se lagata daman
jor aur zulm se us ke na kabhī ghabrana
na kabhī shikwa-e-bedad zaban par lana
kaam hargiz na kisi se nahin aana-jaana
koi kuchh puchhe to munh dekh ke chup rah jaana
na takallum na ishaarat na hikayat na suKHan
yaad us shoKH ki kya kya hi sitam lati hai
jaan bechaini se tan mein mere ghabraati hai
aah karta hun to bijli si nikal aati hai
jab main rota hun to aankhon se baras jati hai
kabhī sawan ki jhaDi aur kabhī bhadon ki bharan
dasht aur koh mein wahshi sā paDa phirta hun
barq ki tarh se betab sada phirta hun
main gharaz tujh se sanam jab se juda phirta hun
raat-din hijar mein jogi sā bana phirta hun
be-qarari se tere nam ki japta sumran
jor aur zulm mere dal ne hazaron hi sahe
shikwa-e-jor bhala tera kahan tak na kare
ab to ye haal hua hijar mein ai yar mare
dosh par bar-e-alam kanon mein gham ke mundre
ashkon ke tar gale mein paDe seli ke naman
ishaq mein jogi hue jab se hamein bhai bhabut
baiThe dar par tere aur guru hai phailai bhabut
dekh Tuk aan ke kis rup mein rang lai bhabut
pairahan gerua aur tan ke upar chhai bhabut
sar se le paun talak KHak mali sau sau man
guh dar-e-kaba pe peshani ko apnī ghisna
gah masjid mein miyan mangna ja-ja ke dua
inkisari se kabhī der mein har-dam jaana
dam-ba-dam aah ki pungi se bajaana ye sada
dekhiye kaun si din har hamein denge darshan
dekha mere tain jo tan ke upar gul khae
aur kapDe bhi range geruwe tan par pae
dekh ye haal tajjub se bashar ghabrae
koi kahta hai ki jogi-ji kidhar ko aae
sach kaho kaun si nagri mein tumhaara hai watan
yaad karte ho use nam usi ka le le
aur zeba hain bahut aap ke tan par sile
wo jogi bhi bane KHub ho tum albele
kaun se panth mein ho kaun guru ke chele
kaun se rup mein ho kaun sā rakhte ho baran
hum ko jogi-ji bata dijiye ye haal apna
tum jo bai-ragi bane is mein nafa kya hai bhala
aur murshid se tumhaare hai tumhein kya pahuncha
nam kya jog mein hai tum ko guru ne baKHsha
dhyan kya rakhte ho kis gyan ka rakhte ho chalan
durr-e-shahwar jala kar jo banai hai bhabut
aur kyun tum batao ye KHush aai hai bhabut
ishaq mein kis ke ye ab tan pe ramai hai bhabut
kis liye munh ke upar tum ne lagai hai bhabut
kis ki ulfat mein ye bairag ka pahna abran
kis liye jog liya aur ranga kapDon ko
kis pe aashiq ho diya ranj ye kis ne tum ko
kyun kar auqat basar hoti hai ye hum se kaho
kya alam khate ho aur kis ki talab rakhte ho
dhwani jal-pan bhi yā yun hi karoge langhan
nam paighambaron ke kafni pe likhe sare
aur gareban mein hain nam KHuda ke likhe
tum to kaamil se nazar aate ho apne lekhe
hum ne jogi to bahut yun hain hazaron dekhe
par tumhaara to zamane se nirala hai chalan
hum ne duniyā mein aji saikDon dekhe jogi
dekhe har rang ke har ek baran ke jogi
par arz tum se nahin dekhe hain hum ne jogi
tum to aate ho nazar hum ko nae se jogi
sach kaho jog liya tum ne ye kis ke karan
kya hua jogi-ji tum ko bhala hum se to kaho
kyun KHajil KHwar paDe phirte ho munh se bolo
kis liye wahshi se phirte ho batao hum ko
kis ki hai yaad tumhein kis ke liye phirte ho
ab kahin baiThoge ya yun hi phiroge ban ban
kis liye ghar se tum aae ho bhala apne nikal
phirte manind-e-saba kyun ho ba-dasht-o-jangal
tum se ek baat kahun us pe agar kije amal
gar karo hukm to banwa den tumhaara asthal
shahar mein bagh mein yar lab-e-dariya-e-jaman
ya kahin aur batao ki jahan aap rahen
ya to jangal mein agar dil lage ye aap kahen
ya ki asthal ke bana dene ki tajwiz karen
ya ki mathura jo pasand aawe to wan jagah len
ya kadar ban mein ho ya mat maha bindraban
aur agar yun hi phiroge to ye hai mushkil saKHt
asthal ek hum jo bana den to zahe apne baKHt
us mein achchha sā bichha dewen tumhaare liye taKHt
KHase phulon ke laga dewen us asthal mein daraKHt
jis se aankhon ko tarawat rahe aur dil ho magan
ab to jogi-ji kaha man lo ye tum mera
ek ja baiTh raho aur karo hum pe daya
mat phiro yun KHajil-o-KHwar ba-dasht-o-sahra
jab to sun sun ke ye hum ne kaha us se baba
tujh ko kya kaam faqiron se ye karna an-ban
kya garaj tujh ko jo puchhe hai tu ahwal mera
jog ki puchhe to bas ishaq mein ye jog liya
aur us ki hi judai mein phire hain har ja
aur watan puchhe hamara to ye sun rakh baba
yā gali dost ki yā yar ke ghar ka aangan
misl-e-sarsar usi kuche mein phira karte hain
dekh darwaze ko bas shad hua karte hain
KHun-e-dil ja-e-mai-e-nab piya karte hain
is ke kuche mein sada mast rahā karte hain
wahi basti wahi nagri wahi jangal wahi ban
gate phirte hain sada bin liye kandhe pe git
jo atiton ki hai muddat se wahi apnī rit
mahw pitam ke hain jab se ki lagi us ki pit
panth ki puchhe to jogi na janm ke na atit
ishaq ke mel mein hum pem ka rakhte hain baran
aa mile dil mein jo ulfat ke the so phuT gae
jitna tha mal mera tab use le luT gae
aqraba dost the jitne wo bhi chhuT gae
jab se is shoKH ke phande mein phanse TuT gae
jitne the mazhab-o-millat ke jahan mein bandhan
ishq mein chhoD ke hum duniya-o-din baiThe hain
KHatir-e-ashufta-o-dil-gir-o-hazin baiThe hain
chhoD sab aish jahan gosha-guzin baiThe hain
us ke hum dar pe munDa sar ke tain baiThe hain
raat-din pite hain dho dho ke usi ke gur ke charan
KHanjar-e-ishq se bas apna kaleja hai shaq
ye to zahir hai nishan munh ka bhi jo rang hai faq
KHun mein aaluda hain zaKHmi hain ki jun rang-e-shafaq
nam ko puchhe to hai nam hamara aashiq
sab se aazad hue yar ka le daman
haal bebaki ka kya apnī bhala tujh se kahen
gar rahen bhuke to hargiz bhi kabhi gham na karen
aur khane ko mile to bhi na kuchh shad rahen
gar rahen jite to jine ki nahin fikr hamein
aur mar jaen to hargiz nahin parwa-e-kafan
dekh nairangi zamane ki hue gil-dar-gil
aur mal tan ko bhabut apne gae KHak mein mil
kapDe rangne ko tu aasan na jaan o ghafil
rang wo rangte hain jis rang ka rangna mushkil
rup bharte hain jis rup ka bharna hai kaThin
chhoDa jannat ko jo aadam ne usi ki KHatir
aur har ek ke ki dam ne usi ki KHatir
ji mein ki apne KHushi gham ne usi ki KHatir
jog bairag liya hum ne usi ki KHatir
sab ke tain chhoD usi ki hai atā ki lagan
range kapDon se na kar hum pe tu jogi ka guman
hum ne kya jaane kiya kis liye aisa saman
gar tu aaqil hai to phir dil hi mein apne pahchan
hum mein aur jogi ki surat mein baDa farq hai jaan
kahan se jogi ki ada aur kahan aashiq ki phaban
aatish-e-gham se jala jab se jalaya dil-o-jaan
tab ye iksir mili hum ko tu shak is mein na jaan
tu to aaqil hai bas ab aqal se apnī pahchan
KHak hai yar ke kuche ki bhabut ab har aan
hum ne bhi rakh banai hai jala kar tan-man
surKH aankhon ka jo puchhe hai ki bais hai kaha
shauq mai ka nahin kuchh zauq nahin afyun ka
qadah bang se na ishaq kabhī hum ko hua
hai atā ke dhaturee ka jo aankhon mein nasha
us ki garmi hi se rahte hain sada surKH nain
koi monis hai na gham-KHwar na hai sang na sat
rahta hawan ranj mein mashghul sada din aur raat
ab KHuda jaane ki kis tarh kaTegi auqat
aur asthal ke banane ki kahi tu ne jo baat
ye bakheDa wo kare jis ke kane ho kuchh dhan
ishaq jab se ki hua hai hamein us achpal se
jab se betab phira karte hain aur bekal se
hum se bekal bhi nahin baiThe hain ek ja kal se
hum faqiron ko bhala kaam hai kya asthal se
wahi asthal hai jahan mar ke baiThe aasan
KHwahish-e-zar na karen aur na kisi se mangain
taKHt aur chatr ki bhi kuchh nahin parwa hai hamein
gokul aur mathura ke rahne ki nahin hirs karen
ja paDen yaad mein us shoKH ki jis basti mein
wahi goggle hai hamein aur wahi hai bindraban
jab se jogi hue di us ko mata-e-dil-o-jaan
chhoD baiThe bhi aaram ka jo tha saman
hajat-e-takiya hai ne KHwahish-e-bistar na makan
ja paDe kak pe rakh sar ke tale hath jahan
hai wahi farsh wahi taKHt wahi singhasan
hai KHayal us gul-e-ruKHsar ka har sham-o-pagah
bagh-baghiche ki hargiz hai nahin hum ko chah
chah hai chah-e-zaqan ki nahin darkar hai chah
phul-phulwari ki bhi jab se nahin kuchh parwah
jab se gul kha ke atā mein jalaya hai badan
rahta hun muztar-o-maghmum main har-dam har-an
hosh-e-gum-karda phira karta hun aur be-saman
baz aa zulm se aur jor se tu haq ko man
ab to is haal ko pahuncha hun tere hijar mein jaan
ai gul-bagh-e-wafa dil ke chaman ke gulshan
kahin kahta hai jo ahwal mera koi zara
sar ko dhunta hai har ek pir-o-jawan aur laDka
ghar mein rahta hun to rota hai har-ik KHwesh apna
ghar se bahar jo nikalta hun to munh dekh mera
mere ahwal pe bhi rote hain jangal mein hiran
KHatir-ashufta main phirta hun hazin-o-dil-gir
ishq mein us ke sabhi kho chuka izz-o-tauqir
phirta hun galiyon mein diwana sā har rose zarir
kya likhun ab to guzarti hai jo kuchh mujh pe 'nazir'
dil-e-man danad wa man danam wa danad dil-e-man
- Book : Kulliyat-e-Nazir Akbarabadi, Edited: Abdulbari Aasi (Pg. 722)
- Author : Nazir Akbarabadi
- Publication : Munshi Navalkishor, Lucknow (1951)
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.