بہار

چمن میں آج نسیم بہار آ پہنچی

نوید نکہت گل بے شمار آ پہنچی

صداے قمری و صوت ہزار آ پہنچی

جنوں کی فوج کی دل پر پکار آ پہنچی

ہزار شکر کہ فصل بہار آ پہنچی

گئی نسیم کے ہاتھوں نکل کے باد سموم

گھٹائیں ابر بہاری کی تل رہی ہیں جھوم

تمام صحن چمن میں عجب مچی ہے دھوم

ادھر گلوں کے اپر بلبلیں کرے ہیں ہجوم

ادھر سے مست صف گل عذار آ پہنچی

چمن کی سیر کو آئے ہیں مل کے مے نوشاں

ہوا ہے بادہ کشی کا بھی خوب سا ساماں

نکالتے ہیں نشے مے کے دل کا سب ارماں

ہوئی ہے گرم چمن بیچ مغبچوں کی شاں

شراب و شیشہ و ساغر کی بار آ پہنچی

کھلے ہیں چاروں طرف زور تختۂ‌ گلزار

چلے ہے سرد صبا اور نسیم عنبر بار

خبر سنی ہے کہ آتا ہے وہ گل مے خوار

گئی مصیبت روز فراق سب یکبار

کہ اب قریب شب وصل یار آ پہنچی

کوئی ہے وصف کرے گل کی تاج داری کا

کسی کو ذکر ہے بلبل کی بے قراری کا

نہیں یہ وقت مری جان انتظاری کا

نہیں یہ وقت مری جان آہ و زاری کا

خوشی ہو اب کہ حد انتظار آ پہنچی