دیکھا تو دربار پہ ہنگامہ ہے برپا

دیکھا تو دربار پہ ہنگامہ ہے برپا

جاں بازوں کا جمگھٹ ہے دل آزاروں کا میلا

بسمل کوئی بیدم کوئی کوئی ہے سسکتا

اور کوئی جگر تھام کے یہ کرتا ہے نالا

دزدیدہ فگندی بمن از ناز نگاہے

قربان نگاہِ تو شوم باز نگاہے

بیٹھا ہے کوئی خاک پہ آسن کو جمائے

استادہ ہے دنیا سے کوئی ہاتھ اٹھائے

بیہوش پڑا کوئی ہستی کو مٹائے

کرتا ہے کوئی عرض یہ گردن کو جھکائے

دزدیدہ گندی بمن از ناز نگاہے

قربان نگاہِ تو شوم باز نگاہے

کہتا ہے کوئی بندۂ بے زر ہوں تمہارا

چلاتا ہے کوئی مری جانب ہو اشارا

فریاد یہ کرتا ہے کوئی نظروں کا مارا

شاہان چہ عجب گر بنو ازند گدا را

دزدیدہ فگندی بمن از ناز نگاہے

قربان نگاہِ تو شوم باز نگاہے

ہاں تیرِ نظر ترک کماندار ادھر بھی

ہاں خنجرِ ابرو کا ہو اک وار ادھر بھی

قربان ترے اے مرے دلدار ادھر بھی

رہ جائے نہ یہ طالب دیدار ادھر بھی

دزدیدہ فگندی بمن از ناز نگاہے

قربان نگاہِ تو شوم باز نگاہے

مصروف نظارہ کوئی با دیدۂ وا ہے

بیخود کوئی مست نگہِ ناز پُر آ ہے

مجذوب کی صورت کوئی بڑ مار رہا ہے

القصہ ہر اک شخص کے لب پر یہ صدا ہے

دزدیدہ فگندی بمن از ناز نگاہے

قربان نگاہِ تو شوم باز نگاہے

مازاغ بھری آنکھوں کا مستانہ ہے کوئی

شمع رخِ پُرنور کا مستانہ ہے کوئی

برقِ شرر طور کا دیوانہ ہے کوئی

یوں نالا کنان بردرِ جانانہ ہے کوئی

دزدیدہ فگندی بمن از ناز نگاہے

قربان نگاہِ تو شوم باز نگاہے

ہر چند کی پتھر سے سر زار کو مارا

پر اُس کے مکان تک نہ ہوا اپنا گزارا

چاہا بھی مگر ہو نہ سکا صبر کا یارا

دل تڑپا نثارِؔ جگر افگار پکارا

دزدیدہ فگندی بمن از ناز نگاہے

قربان نگاہِ تو شوم باز نگاہے