qaumi yak-jehti

ḳhār-o-ḳhas ġhuncha-o-gul barg-o-shajar shāḳh-o-samar

sab gulistāñ ke liye husn kā ganjīna haiñ

paye taskīn-nazar dīda-e-bianā ke liye

muḳhtalif ruup kā ye ek hī ā.īna haiñ

ek dil ek taḌap ek nazar ek ḳhayāl

aaj har bazm meñ in lafzoñ ko samjhā jaaye

zāviye kuchh bhī hoñ ta.amīr asar ho lekin

koī mahfil ho usī Dhañg se sochā jaaye

ab kisī ḳhaar ko bhī ḳhaar na samjhā jaaye

us ko majbūr kaaro phuul kī fitrat sīkhe

nāz-o-andāz kare aur mohabbat sīkhe

iqtizā vaqt kā ye hai na ho maz.hab kā savāl

aur ye bhī hai zarūrī na ho bolī taqsīm

aaj hāsil kare har shaḳhs musāvāt kā dars

ya.anī phailā.e shab-o-roz vafā kī ta.alīm

ek mai-ḳhāna ho ek saaqī ho aur ek hī jaam

shart itnī hai ki mai-ḳhvāroñ ko bharpūr mile

vo parastār kisī ke hoñ kisī ke mahbūb

sab hoñ mai-nosh to sab ko mai-e-añgūr mile

farz imroz hī mafhūm hai in sheroñ kā

maiñ huuñ fankār to mujh par bhī hai zimmedārī

itnī yak-jehatī ho aapas meñ baḌhe itnā pyaar

ab kisī ko bhī kisī se na rahe be-zārī

jo bhī is mulk meñ rahtā hai ye mulk us kā hai

saaf likkhā hai ye jamhūr kī peshānī par

sab barābar haiñ yahāñ sab ko yahīñ rahnā hai

ham ko ab naaz hai ḳhud apnī nigahbānī par

ham agar ek haiñ ye mulk bhī pā.indā hai

ham agar ek haiñ ye mulk bhī tābinda hai

ham agar ek haiñ ye mulk bhī ḳhursandā hai

ham agar ek haiñ ye mulak bhī raḳhshanda hai

ye hoñ jazbāt to phir firqa-parastī kaisī

bazm-e-yārāñ kā har ik rukn ho be-misl 'azīz'

kaash aisā hī zamāna rahe sadiyoñ qaa.em

na koī farq rahe aur na rahe koī tamīz

KHar-o-KHas ghuncha-o-gul barg-o-shajar shaKH-o-samar

sab gulistan ke liye husn ka ganjina hain

paye taskin-nazar dida-e-biana ke liye

muKHtalif rup ka ye ek hi aaina hain

ek dil ek taDap ek nazar ek KHayal

aaj har bazm mein in lafzon ko samjha jaye

zawiye kuchh bhi hon tamir asar ho lekin

koi mahfil ho usi Dhang se socha jaye

ab kisi KHar ko bhi KHar na samjha jaye

us ko majbur karo phul ki fitrat sikhe

naz-o-andaz kare aur mohabbat sikhe

iqtiza waqt ka ye hai na ho mazhab ka sawal

aur ye bhi hai zaruri na ho boli taqsim

aaj hasil kare har shaKHs musawat ka dars

yani phailae shab-o-roz wafa ki talim

ek mai-KHana ho ek saqi ho aur ek hi jam

shart itni hai ki mai-KHwaron ko bharpur mile

wo parastar kisi ke hon kisi ke mahbub

sab hon mai-nosh to sab ko mai-e-angur mile

farz imroz hi mafhum hai in sheron ka

main hun fankar to mujh par bhi hai zimmedari

itni yak-jehati ho aapas mein baDhe itna pyar

ab kisi ko bhi kisi se na rahe be-zari

jo bhi is mulk mein rahta hai ye mulk us ka hai

saf likkha hai ye jamhur ki peshani par

sab barabar hain yahan sab ko yahin rahna hai

hum ko ab naz hai KHud apni nigahbani par

hum agar ek hain ye mulk bhi painda hai

hum agar ek hain ye mulk bhi tabinda hai

hum agar ek hain ye mulk bhi KHursanda hai

hum agar ek hain ye mulak bhi raKHshanda hai

ye hon jazbaat to phir firqa-parasti kaisi

bazm-e-yaran ka har ek rukn ho be-misl 'aziz'

kash aisa hi zamana rahe sadiyon qaem

na koi farq rahe aur na rahe koi tamiz