’’تب یاد تمہاری آتی ہے‘‘

’’تب یاد تمہاری آتی ہے‘‘

گھنگھور گھٹائیں چھاتی ہیں

جب کوئل شور مچاتی ہے

جب ٹھنڈی ہوائیں آتی ہیں

ہر ایک کلی کھل جاتی ہے

تب یاد تمہاری آتی ہے

پر کیف فضاؤں میں اکثر

جب بھونرا جھوم کے آتا ہے

اور بیٹھ کے ہر ہر غنچے پر

جب راگ سہانے گاتا ہے

تب یا د تمہاری آتی ہے

ان بھیگی بھیگی راتوں میں

جب پی کی صدائیں آتی ہیں

ان پریم بھری برساتوں میں

جب آنکھیں مینہ برساتی ہیں

تب یاد تمہاری آتی ہے

جب مست نظارے ہوتے ہیں

اور دور سے کوئی گاتا ہے

جب جگمگ تارے ہوتے ہیں

اور چاند جھلک دکھلاتا ہے

تب یاد تمہاری آتی ہے

جب چاندنی چھٹکی ہوتی ہے

کچھ اور ہی عالم ہوتا ہے

جب ساری دنیا سوتی ہے

میں ہنستا ہوں دل روتا ہے

تب یاد تمہاری آتی ہے

جب ٹیس سی اٹھتی ہے اکثر

اک درد سا دل میں رہتا ہے

جب اشک چھلک کر دامن پر

افسانۂ الفت کہتا ہے

تب یاد تمہاری آتی ہے