دیکھو عمل کی دیوی وہ مسکرا رہی ہے

دیکھو عمل کی دیوی وہ مسکرا رہی ہے

بجلی گرارہی ہے غیرت دلا رہی ہے

بکھرے ہوئے نہیں ہیں موئے دراز اس کے

افسانہ ہائے ماضی تم کو سنا رہی ہے

کب پھول جھڑ رہے ہیں اس کی ہنسی کے پیہم

تم سب کی غفلتوں پر آنسو بہا رہی ہے

کب ہے لچک کمر میں افراط نازکی سے

یہ ضعف کے سبب سے یوں لڑکھڑا رہی ہے

ہرگز نہ تم سمجھنا رقص سرور اس کو

یہ فرط درد وغم سے یوں تلملا رہی ہے

دامن میں اس کے ہرگز گرہیں نہیں پڑی ہیں

تم کو تمہاری بھولی باتیں بتا رہی ہے

اپنے لیے نہیں ہے ذوقِ ترنم اس کا

غفلت کی نیند سے یہ تم کو جگا رہی ہے

ہے بربنائے غیرت یہ اس کی دورباشی

اس سے نہ تم سمجھنا دامن بچا رہی ہے

احساس جب تمہیں کو پیدا نہ ہوتو کیا ہو

آغوش الفت اس کی ہر وقت وا رہی ہے

ہو جوش تو اٹھو تم، ہو شوق تو بڑھو تم

دیکھو تمہاری جانب وہ خود اب آ رہی ہے

لپکو گلے لگالو، آغوش میں اٹھا لو

اب تک تو بےکسی میں یہ مبتلا رہی ہے

ہے جو ادا وہی ہے دل موہ لینے والی

ہے جو نظر پیام اقدام لارہی ہے