در کرامت و اعجاز ہے منیر شریف

در کرامت و اعجاز ہے منیر شریف

حریم جلوہ گہ راز ہے منیر شریف

دیارِ شرق میں وہ اولین صدائے اذاں

ہنوز گوش بر آواز ہے منیر شریف

موحدوں کی وہ مشرق میں پہلی جولانگہ

فشانِ راہِ تگ و تاز ہے منیر شریف

زمینِ گنجِ شہیداں ہے آج تک گل پوش

یہ کس کے خوں سے گلباز ہے منیر شریف

جنابِ مومنِ عارف کے نورِ ایماں سے

نگاہِ شوق میں ممتاز ہے منیر شریف

شیوعِ دین بدستِ امام تاج فقیہ

اسی کا نقطۂ آغاز ہے منیر شریف

اسی میں دفن ہیں مخدوم احمد یحییٰ

اسی سے مایۂ صد ناز ہے منیر شریف

اسی کی خاک سے اٹھے تھے شیخ شرف الدین

اسی شرف سے سرفراز ہے منیر شریف

یہیں تھا مدرسۂ دین شیخ رکن الدین

انہی کے سوز سے دمساز ہے منیر شریف

یہیں ہے درگہِ مخدوم شاہ دولت بھی

انہی کے فیض کا غماز ہے منیر شریف

جنابِ صوفی و شمسؔ حزیں کے نغموں سے

حریفِ دہلی و شیراز ہے منیر شریف