جو لکھوں تیری شان میں کم ہے

جو لکھوں تیری شان میں کم ہے

مظہر جود وفخر عالم ہے

آسماں تیرے آستاں پہ سدا

پئے تسلیم سر کئے خم ہے

مہر بھی تیرے آستانے پر

ذرّہ ساں بندگی میں ہردم ہے

ماہ طلعت جواں کوئی تجھ سا

دور میں چرخ پیر کے کم ہے

تیرے زور شباب کے آگے

صفت پیر زال رستم ہے

تیرے در کا گدا تونگر ہے

جام فقرا س کا ساغرِ جم ہے

نام نامی ترا سلیماں وار

نقش ہر دل پہ مشل خاتم ہے

بحرِ فیض آپ کا روانی میں

تشنہ کاموں کے واسطے یم ہے

ہیں تونگر بھی تیرے دست نگر

تو کرم میں سبھوں سے اکرم ہے

تیرا الطاف بہر دوست ہے قند

قہر تیرا پئے عدو سم ہے

گل ہیں خواہاں نسیم شفقت کے

ملتجی آبرو کی شبنم ہے

شوقؔ خستہ کی یہ دعا حق سے

سحر وشام بس یہ ہردم ہے

یا الٰہی اسے تو شاداں کر

مہر جب تک فلک پہ قایم ہے