umas

kyā abr kī garmī meñ ghaḌī pahar hai umas

garmī ke baḌhāne kī ajab lahar hai umas

paanī se pasīnoñ kī baḌī nahr hai umas

har baaġh meñ har dasht meñ har shahar hai umas

barsāt ke mausam meñ nipaT zahar hai umas

sab chiiz to achchhī hai par ek qahr hai umas

badlī ke jo ghir aane se hotī hai havā band

phir band sī garmī vo ġhazab paḌtī hai yak chand

pheñke koī pagḌī koī khole hai khaḌā band

dam ruk ke ghulā jaatā hai garmī se har ek band

barsāt ke mausam meñ nipaT zahar hai umas

sab chiiz to achchhī hai par ek qahr hai umas

idhar to pasīnoñ se paḌī bhīge haiñ khāTaiñ

garmī se udhar miil kī kuchh chyūñTiyāñ kāTeñ

kapḌā jo pahaniye to pasīne use āTaiñ

nañgā jo badan rakhiye to phir makkhiyāñ chāTeñ

barsāt ke mausam meñ nipaT zahar hai umas

sab chiiz to achchhī hai par ek qahr hai umas

rukne se havā ke jo burā hotā hai ahvāl

pañkhā koī āñchal koi dāman koī rumāl

dam dhoñkne lagtā hai lohāroñ kī goyā ḳhaal

kuchh ruuh ko betābiyāñ kuchh jaan ko janjāl

barsāt ke mausam meñ nipaT zahar hai umas

sab chiiz to achchhī hai par ek qahr hai umas

umas meñ to lāzim hai na pañkhā na havā ho

ek koTharī ho jis meñ dhuāñ ḳhuub bharā ho

aur makkhiyoñ ke vāste guḌ tan se malā ho

us vaqt maza dekhiye umas kā ki kyā ho

barsāt ke mausam meñ nipaT zahar hai umas

sab chiiz to achchhī hai par ek qahr hai umas

kya abr ki garmi mein ghaDi pahar hai umas

garmi ke baDhane ki ajab lahar hai umas

pani se pasinon ki baDi nahr hai umas

har bagh mein har dasht mein har shahar hai umas

barsat ke mausam mein nipaT zahar hai umas

sab chiz to achchhi hai par ek qahr hai umas

badli ke jo ghir aane se hoti hai hawa band

phir band si garmi wo ghazab paDti hai yak chand

phenke koi pagDi koi khole hai khaDa band

dam ruk ke ghula jata hai garmi se har ek band

barsat ke mausam mein nipaT zahar hai umas

sab chiz to achchhi hai par ek qahr hai umas

idhar to pasinon se paDi bhige hain khaTain

garmi se udhar mil ki kuchh chyunTiyan kaTen

kapDa jo pahaniye to pasine use aaTain

nanga jo badan rakhiye to phir makkhiyan chaTen

barsat ke mausam mein nipaT zahar hai umas

sab chiz to achchhi hai par ek qahr hai umas

rukne se hawa ke jo bura hota hai ahwal

pankha koi aanchal koi daman koi rumal

dam dhonkne lagta hai lohaaron ki goya KHal

kuchh ruh ko betabiyan kuchh jaan ko janjal

barsat ke mausam mein nipaT zahar hai umas

sab chiz to achchhi hai par ek qahr hai umas

umas mein to lazim hai na pankha na hawa ho

ek koThari ho jis mein dhuan KHub bhara ho

aur makkhiyon ke waste guD tan se mala ho

us waqt maza dekhiye umas ka ki kya ho

barsat ke mausam mein nipaT zahar hai umas

sab chiz to achchhi hai par ek qahr hai umas