امروز روز شادی و امسال سال گل

آج کا دن بہت ہی خوشی کا دن ہے اور اس بار سال گلوں کا سال ہے۔

ہم نے اپنا حال اچھا کر رکھا ہے تاکہ اس گل کی حالت اچھی رہے۔

گل کو یار کے چہرے کے گلزار سے مدد ملی ہے۔

تاکہ ہماری آنکھوں کو گل کی جدائی نہ دیکھنی پڑے۔

نرگس کی آنکھیں مست ہیں اور باغ کا چہرہ چمک رہا ہے۔

یہ سب گل کے جاہ وجلال لطف اور کمال سے ہو رہا ہے۔

سوسن نے زبان کھول کر سرو کے کان میں

بلبل کی محبت کے راز اور گل کے سراپا حسن کا اظہار کیا۔

گل اپنے کپڑے پھاڑتا ہوا ہم پر رحمت برسانے آیا۔

اسی وجہ سے ہم بھی گل سے ملنے کی چاہ میں اپنے کپڑے پھاڑ رہے ہیں۔

گل اس جہان سے وابستہ ہے۔ وہ اس جہان میں نہیں سما سکتا۔

خیالوں کی دنیا میں گل کے خیال نہیں سما سکتے۔

گل کون ہے؟ عقل اور روح کی دنیا کا پیامبر ہے۔

گل کیا ہے؟ گلزار کے جاہ اور جمال کا پیمانہ ہے۔

ہمیں گل کا دامن پکڑکر گل کے ساتھ ہو لینا چاہئیے۔

اور ناچتے گاتے گل کے اصل کی جانب چلنا چاہئیے۔

پہلے اس میں جان پڑتی ہے پھر اسے نئے پنکھ ملتے ہیں۔

چاہے جتنا بھی آپ گلوں کے پر و بال توڑ ڈالیں (اس کو کوئی نقصان نہیں ہے۔)

اے دوست! کلی کی طرح خاموش ہو جاؤ اور ہونٹوں کو مت کھولو۔

گل کے سایے تلے زیر لب مسکراؤ۔