ز عشق دوست ہر ساعت درون نار می رقصم

میں محبوب کی محبت کے باعث ہر دم آگ میں ناچتا ہوں، کبھی خاک لوٹتا ہوں، کبھی کانٹوں پر رقص کرتا ہوں۔

میں اس کے عشق میں بدنام ہوگیا ہوں، اے زاہد، تو بھی آکر دیکھ، مجھے بدنامی کا ذرا خوف نہیں، میں سر بازار رقص کرتا ہوں۔

اے مطرب اور جام پلانے والے ساقی! کوئی درد بھرا نغمہ چھیڑ اور دل میں شوق پیدا کر، میں اب وصل کی خوشی میں قلندر وار رقص کرتا ہوں۔

مجھے مخلوق کہتی ہے کہ اے فقیر! تو کس لیے اتنا ناچتا ہے؟ میں نے کہا، دل میں اسرار رکھتا ہوں، اسی اسرار کے باعث رقص کرتا ہوں۔

مخلوق اس لیے ہمیشہ میری ملامت کرتی ہے لیکن میں اپنے اس ذوق پر ناز کرتا ہوں کہ اپنے محبوب کے سامنے رقص کرتا ہوں۔

اے صوفی! اگر تو میرا دوست بن جائے تو میں یہ خرقہ پہن لوں لیکن میں نے تو زنار باندھا ہوا ہے اور کتنا بھلا لگتا ہے اور میں اس کا دیدار کرنے کے خاطر ناچتا ہوں۔

جب یار اپنے جلوے سے مجھے مدہوش کر دیتا ہے تو معلوم نہیں کہ آخر کیوں دیدار کے وقت رقص کرتا ہوں۔

دوست کے حلقۂ دل میں کیا صراحی کیا آواز، تو کم نغمہ گائے تو تو کم نغمہ سرائی کرے گا اور میں تو بے پناہ رقص کرتا ہوں۔

تو تو وہ قاتل ہے جو صرف تماشے کے لیے مجھے قتل کرتا ہے، میں وہ گھائل ہوں کہ خونخوار خنجر کے نیچے بھی رقص کرتا ہوں۔

مجھے رندی بھا گئی ہے کہ میں ان کے پاؤں کو بے پناہ پارسائی کے ساتھ (اپنی آنکھوں پر) ملتا ہوں، میں لائق مبارک باد اور لائق تحسین ہوں کہ جبہ و دستار سمیت رقص کرتا ہوں۔

مجھ پر تپش نے جو حالت وارد کی ہے میں اس سے اور بھی شعلہ کی طرح تڑپتا اور مچلتا ہوں اور خلش اور چبھن جب مجھے لذت بخش دیتی ہے تو میں کانٹے کی نوک کے نیچے بھی رقص کرتا ہوں۔

اے دوست آ کر جاں بازوں کے ہجوم میں تماشہ دیکھ، میں بدنامی اور رسوائی کے سو سامانوں کے ساتھ سربازار رقص کرتا ہوں۔

میں عثمان مروندی خواجہ منصور کا دوست ہوں اور میں کسی ملامت سے نہیں ڈرتا، نہیں گھبراتا، میں تو سولی پر بھی رقص کرتا ہوں۔