Ahsan-ul-Qasas (Qissa Yousuf Zulaikha) زلیخا دا دوجی وار سفنہ دیکھنا . 14 خواب وّچ نوری صورتَ دا مڑ پرگٹ ہونا
Ahsan-ul-Qasas (Qissa Yousuf Zulaikha) زلیخا دا دوجی وار سفنہ دیکھنا . 14 خواب وّچ نوری صورتَ دا مڑ پرگٹ ہونا
غلام رسول عالم پوری
MORE BYغلام رسول عالم پوری
زلیخا دا دوجی وار سفنہ دیکھنا . 14
خواب وّچ نوری صورتَ دا مڑ پرگٹ ہونا
تاں سفنے وّچ دوجی واری، اوہا شکل دس آئی ۔
اوہو رمزاں اوہو غمزے، ذرا فرق ن کائی ۔
اوہو ناز نہورا تازه، اوہو سرِو خراماں ۔
اوہو شہد کرشمیوں رسدا، تیہی بہی بداماں ۔
......................................................
،اوہو لٹ لے جاون والا، ملیا دوجی واری
اوہو جس دیاں وچ قضیاں، کیتی گریازاری ۔
دیکھ چھٹے گھا خون پھہارے، دیکھ قدم سر دھردی ۔
رو رو پکڑ قدم دیاں تلیاں، ازز ہزاراں کردی ۔
زلیخا دی بنے
اے دلدار کمنداں والیا، مہبوبا میں واری ۔
تیرے ناز کرشمیاں اتے، میں قربان بیچاری ۔
جیون جوگیا جو کجھ ہو گیا، سن لے درد کہانی ۔
جے ن مری میں مر جانی، توں مت خام پچھانی ۔
.....................................................
جس دن دا میں تینوں ڈٹھا، اپنا آپ بھلایا ۔
جس دن دا میں تینوں پایا، خود نوں روڑھ وگایا ۔
جس دن دا میں تینوں لبھا، ہور سبھا سٹّ پایا ۔
جس دن دا میں تینوں پوجیا، پوجا دا وّل ن آیا ۔
جس دن دا توں میں گھر آیا، میرا رہا ن کائی ۔
جس دن دا توں مینوں لٹیا، درداں نے لٹّ پائی ۔
...........................................................
وسیں زمیں یا آسمانیں، چند ہوویں یا تاره ۔
یا توں سورج یا توں بجلی، یا توں کجھ نیارا ۔
یا توں صرف برہوں دا شوئلا، یا آہاں دیاں لاٹاں ۔
یا توں داغ غماں دا روشن، یا فرکت دیاں واٹاں ۔
............................................................
کی پیدائش کہڑی جنسوں، کی کجھ ہیں شے کائی ۔
کدھر آویں پھیریاں پاویں، مطلب تدھ کیائی ؟
جواب نوری صورتَ دا
سن اسنے ایہہ گریازاری، انت ایہا فرمایا ۔
میں ہاں خاکی آدمزادا، شوق تیرے ات آیا ۔
جیوں توں میریاں درداں اندر، رو رو کریں دہائی ۔
اوویں میں بھی شوق تیرے دی، سر پور آفت چائی ۔
........................................................
اک دم دور نہیں میں تیں تھیں، توں بھی دور ن جائیں ۔
ہاں میں دل تھیں نیڑے تیرے، پوریاں کریں وفائیں ۔
........................................................
رکھ پچھان اساڈی صورتَ، بنھ نقشہ وچ دل دے ۔
یاریاں والے سخت کوشالے، یار ن سوکھے ملدے ۔
سفنے توں بے داری
ایہہ گّل آکھ گیا اوه اوویں، صورتَ کتے چھپائی ۔
رہی زلیخا خوابے اندر، بے خود سرت ن کائی ۔
.......................................................
پہلی واری دھر بیماری، کر لاچار گیا سو ۔
دوجی واری کارن کاری، آیا مار گیا سو ۔
مار گیا پر پار ن کیتی، چھوڑ گیا لٹکائی ۔
عشقَ پیار ادھار بزائت، جان گئی وچ سائی ۔
..............................................................
رووے کدے کداہیں ہسے، ڈبدی کدے خیالیں ۔
جامے چیرے سر نوں کھوہے، خاک گھتے چا والیں ۔
کھڑی زمیں تے ڈگّ ڈگّ پیندی، تے وچ خاک رلیندی ۔
باندیاں حاَل پچھیندیاں اسدا، تے ایہہ ہتھ ملیندی ۔
............................................................
دیوانی ہو گئی زلیخا، خبر نہیں کی ہویا ۔
نالے باپ دکھیں دل بھریا، نین لہو بھر رویا ۔
روگی روگ ڈٹھے جنھ ویداں، کیتیاں بہت دوائیں ۔
اثر خلاف ہویا پر ظاہر، ودھیاں درد بلائیں ۔
..............................................................
آخر عقلمنداں فرمایا، قید رکھو زنجیروں ۔
ایہہ کوشالے برہوں والے، کد ہٹدے تدبیروں ۔
تے اوه حاَل کسے ن مالم، راتیں دے پیماناں ۔
ایہہ دیوانی کر کر سٹی، جسنے مار نشانہ ۔
زلیخا بندی وّچ
تیموسے زنجیر سنہری، جڑیا موتیاں والا ۔
دختر دے اوه پیریں پایا، چند دوالے ہالہ ۔
تے چا حجرے وچ سٹائی، ہور ن عقلاں چلیاں ۔
مت ایہہ کرے خوار اسانوں، پھرے متاں وچ گلیاں ۔
رات دنے وچ غم دے حجرے، عقل قیاسوں خالی ۔
باجھ حواس رہے متوالی، بہوتیاں درداں والی ۔
.........................................................
بال اننجانی برہوں ظالم، بھارا بھار چوایا ۔
سٹّ ن سکے چاون اوکھا، اسدا مغز کھپایا ۔
جاں ایہہ زخم پرانا ہویا، لگیاں ملن دوائیں ۔
دن کائی آرام کماوے، وگسی پھیر کدائیں ۔
اشکا چل صبر گھر نیڑے، منزل اجے دراڈی ۔
پانی چھڑک کرم دا اک دم، جلدی جان اساڈی ۔
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
