گرچہ غرقِ بحرِ عصیانیم ما

اگر چہ حال یہ ہے غرقِ بحرِ عصیاں ہیں

مگر ہم آیۂ لا تقنطوا سے شاداں ہیں

ملے جو اذن تو باہر ہی ایستادہ رہیں

جو ہم نہ لائقِ دربارِ عشق و عرفاں ہیں

ترے وصال کی خاطر زمینِ عجز پہ ہم

ہوا ہے ایک زمانہ کہ سجدہ ساماں ہیں

نہ دستگیر ہو لطف و کرم اگر تیرا

تو ہم پہ تابہ ابد خجلتوں کے طوفاں ہیں

تری صفات بھی جب عقلِ کل سے ہوں نہ بیاں

تو کنہِ ذات سے آگاہ کب ہم انساں ہیں

ضعیف و خستہ و بے چین چیونٹیاں ہی سہی

نگاہِ لطف ہو تیری تو ہم سلیماں ہیں

ہمارے حال پہ اے خواجہ رحم کیجئے کہ ہم

درِ حضور پہ مشغولِ ذکرِ یزداں ہیں

اگر نہ آپ ہمیں اپنی ذات تک لے جائیں

تو ہم توبے بصرو بے خبر ہیں ناداں ہیں

گدائے وصل ہیں ہم پر عطا ہو کچھ للہ

کہ بزمِ عشق میں ہم بے نوا سے انساں ہیں

ہوا ہے مہرؔ علی سوزِ دل سے نالہ بلب

صدا یہی ہے کہ جو یائے وصلِ جاناں ہیں