با کارم و بے کارم چوں مد بہ حساب اندر

میں بے کار بھی ہوں اور کار آمد بھی ہوں، جس طرح شمار میں مد کی حیثیت ہوتی ہے (یعنی مد کو علیحدہ سے لکھا جائے تو حروف میں اس کا شمار نہیں ہوگا اور حسب ضرورت کسی حرف پر ہو تو بہت کار آمد ہے) میں بولتا بھی ہوں اور خاموش بھی جیسے کتاب کی تحریر۔

اے زاہد ظاہر پرست! تو مجھ سے قرب (حق تعالیٰ )کی بات کیا پوچھتا ہے؟ وہ مجھ میں ہے اور میں اس کی ذات میں اس طرح گم ہوں جیسے گلاب کے اندر کی خوشبو (یعنی اللہ سے میرا تعلق ایسا ہی ہے جیسا خوشبو کا گلاب سے )۔

میں خوش ہوں اور کبھی غمزدہ ۔ اپنی کیفیت کے ادراک سے خود ہی غافل، میں روتا بھی ہوں اور ہنستا بھی ہوں، جیسے بچہ نیند کی حالت میں روتا یا ہنستا ہے (شاید کہ حضرت یہ کہنا چاہتے ہیں کہ نوید رحمت سے خوش ہوجاتا ہوں اور وعیدعذاب سے رونے لگتا ہوں۔ یا خوف ورجا کی کیفیت کا بیان یہاں مقصود ہو)۔

نصیر الدین کے سینے میں عشق (الٰہی) کے سوا کسی چیز کی گنجائش نہیں۔ یہ عجیب تماشا ہے کہ دریا بلبلے میں سماجائے (یعنی عشق الٰہی پانی وسعت، جوش اور گہرائی کی بنا پر مثل دریا ہے، اور دل مختصر ہونے کی بنا پر مانند بلبلہ ہے۔یہاں عشق الٰہی کی طرف اشارہ ہے۔یہ مومن کے لئے بڑی بات ہے کہ اس کا دل عشق الٰہی کا حامل ہو جاتا ہے)۔