ما قلندر مشرباں را رسم و راہے دیگر است

ہم قلندر مشربوں کی رسم و راہ دوسری ہے خاکساروں کی عزت و جاہ اس راہ میں دوسری ہے (قلندر مشرب سے سلسلہ قلندریہ کی نسبت مراد ہے جو حضرت فرد کو حاصل تھی، معنوی اعتبار سے وارفتہ صوفی مراد ہیں۔ مفہوم یہ ہے کہ اس راہ قلندری میں اعمال ظاہری کے رسوم سے کم اور باطنی امور کی طرف توجہ زیادہ ہے، اس رہ قلندری میں خاکساروں کی جو عزت ہے وہ دینوی عز و جاہ سے مختلف ہے)۔

عشق کے جوئے میں جان ہارنا میری طاعت ہے، یہاں طاعت دوسری یہاں جرم و گناہ دوسرے ہیں (عشق کو جوئے سے تعبیر کیا ہے۔ جوئے میں رقم ہارتے ہیں، عشق میں زندگی۔ زندگی کی حفاظت شرعا ضروری ہے، اور اس کے خلاف کرنا جرم و گناہ ہے، لیکن عشقِ حقیقی میں سرمایۂ زندگی ہار جانا جرم نہیں طاعت ہے، اس لئے وہ قلندری ایسی راہ ہے کہ یہاں طاعت کا مفہوم اور جرم و گناہ کا معنی مختلف ہے)۔

جبہ و دستار کو یعنی زہد و تقویٰ کو شرابِ عشق کے عوض گروی کر دینا ہمارا مذہب ہے، میں رند ہوں اور مغاں کے کوچہ میرے لئے دوسری سجدہ گاہ ہے۔

میرا مشغلہ دوسرا ہے مجھے زاہد و شیخ سے کیا مطلب؟ میرا قبلہ اور میرا کعبہ کسی اور کا دولت پناہ آستانہ ہے (یعنی میں اپنے مشغلۂ عشق حقیقی میں ریا سے دور ہوں، اور میں نے آستانۂ نبو کو اپنا ملجا بنا لیا ہے)۔

میں نے عشق کی آتش جوالہ میں اپنے دونوں جہان کے مال و متاع کو پھونک ڈالا ہے اور فرد اب خرمن کو جلا ڈالنے والی بجلی ہے، جس کی آہ و فغاں مختلف ہے۔