اپنے کنبے والوں اور نزدیکوں اور قریبوں سے بہت محبت اور ادب سے برتاؤ کرو تاکہ کہ ان کے دل میں تمہاری محبت اور زبان پر تمہاری تعریف ہو اور اپنے آپ کو سب سے کم جانو۔

خدا سے ہمیشہ یہ دعا کیا کرو کہ وہ ہماری نیتوں میں اخلاص دے۔

دنیا ناپائیدار ہے، نہ یہاں کی خوشی باقی رہتی ہے نہ رنج و غم باقی رہتا ہے، یہاں سب مسافر ہیں، اپنے اپنے وقت پر سب کوچ کرنے والے ہیں۔

دنیا کی عزت اور آخرت کی عزت اس میں ہے کہ فقر و فاقہ پر قناعت کرو اور خدا کے واسطے اس کی اشاعت کرو کہ کسی طرح لوگوں کو پہنچ جائے، دنیا اور اہلِ دنیا اس کے مخالف ہیں۔

دنیا کی نظروں میں شیخ، سید، پٹھان کو شریف سمجھتے ہیں اور تیلی جولاہے کو رذیل لیکن حق تعالیٰ کے یہاں شرافت شیخ سید ہونے پر نہیں بلکہ اس کے اخلاق و اخلاص پر ہے۔